Milli Televiziya və Radio Şurası (MTRŞ) avqust-sentyabr aylarında televiziya və radio proqramlarının monitorinqini aparıb. 6 televiziya kanalı (İctimai TV, ATV, Space TV, Lider TV, Xəzər TV, ARB TV) və 12 radionun (İctimai radio, Azad Azərbaycan, Antenn, 105.5 FM, Jazz FM, Space, Xəzər, Media FM, ARAZ FM, Avto FM, ASAN) verilişlərində aparılan monitorinqin nəticələri bu gün açıqlanıb. Report yazır ki, MTRŞ dil normalarının fonetik, leksik, qrammatik və üslubi səviyyədə pozulduğunu aşkarlayıb.
MTRŞ sədri Nuşirəvan Məhərrəmli deyib ki, şou xarakterli verilişlərdə aparıcılar bayağı, loru dildə olan sözlərdən istifadə edir.
“Televiziyalarda və ya radiolarda məişət dilində danışıqlara da rast gəlinir. Adi yaşayışda buna normal yanaşırıq, bu danışıq tamaşa, yaxud bədii filmlərdə ola bilər. Lakin aparıcının dilində bu cür ciddi nöqsanlar olmamalıdır” – N.Məhərrəmli deyib.
Konfransda prezidentin ictimai-siyasi məsələlər üzrə köməkçisi Əli Həsənov da iştirak edib. Nöqsanlar barədə çıxışında deyib ki, hər məmur öz ana dilini bilməlidir:
“Hər bir məmur xarici dili bilmirsə, əlbəttə bu, onun çatışmazlığıdır. Xarici dili bilmək məmura üstünlük gətirir, amma bilməməsi onun qəbahəti deyil, qəbahət milli dili bilməməkdir. O cümlədən bu, ziyalılara aiddir, o cümlədən bu, bizim jurnaistlərə aiddir, o cümlədən Azərbaycan ərazisində vətəndaşlıq statusu daşıyan istənilən insana aiddir” – Əli Həsənov deyib.
