Sabahdan satışa çıxacaq Yandex istehsalı olan smartfon barədə bilməli olduqların

Rusiya mərkəzli, başda axtarış mühərriki olmaqla istifadəçilərə bir çox internet xidməti təklif edən Yandex özünün ilk smartfonunu hazırlayıb. Ən böyük rəqibi Google olsa da Yandex istehsalı olan və “Yandex.Phone” adlanan telefonların da əməliyyat sistemi Android olacaq. Bu cihazın əsas fərqi odur ki, telefonda standart xidmət provayderi olaraq Google yox, Yandex olacaq. Şirkətin bunu necə və hansı səviyyədə bacardığı isə sual altındadır. Səbəb isə odur ki, Androidin istehsalçısı olan Google bu sistemi istifadə edən bütün cihazlarda standart provayder olaraq Google xidmətlərini quraşdırmağa məcbur etməsidir. Google-ın ən böyük rəqibi olan Yandexin bunu necə etdiyinin bazarda ciddi maraq doğuracağı gözlənilir.

Cihazın texniki xüsusiyyətlərinə gəldikdə isə, Yandex.Phone Snapdragon 630 (Qualcomm) prosessoru və 4GB RAM ilə orta seqmentasiya üçün istehsal olunduğunu göstərir. 64 GB yaddaş seçimi olan cihaz 5,65 düym FullHD ekran və 12 meqapx./5 meqapx. cüt kamera ilə təchiz olunub. İstifadəçi məlumatlarının qorunması üçün barmaq izi skaneri və təmassız ödəmələr üçün NFC çipi ilə təqdim olunan cihaz süni intellekt “dəbindən” də yan keçməyib. Şirkətin yaratdığı və brauzerdə artıq uzun müddətdir istifadə olunan “Alisa” süni intellektli asistenti də cihazda istifadə olunacaq. Asistentin və həmçinin şirkətin bütün xidmətlərinin telefona tamamilə inteqrasiya olunduğunu bildirən şirkətin nümayəndəsi Fyodor Yezovi deyib:

“Bu telefonda bir əməliyyatı aparmaq üçün uyğun tətbiqi açmağınıza ehtiyac yoxdur, Alisadan soruşmağınız kifayətdir”.

Dekabrın 6-dan etibarən telefon ancaq Rusiya bazarı üçün onlayn satışa çıxarılacaq və onu Yandex Store-dən əldə etmək mümkün olacaq. Telefonun qiyməti 17990 rubl, yəni təxminən 270 dollardır.