Avropa İnsan Haqları Məhkəməsi hesab edir ki, Azərbaycan məhkəmələri “Azadlıq” qəzetinin şöbə müdiri, jurnalist Seymur Həzinin Avropa Konvensiyasının 5-ci (Azadlıq və toxunulmazlıq hüququ) maddəsi ilə təminat altına alınan hüquqlarını pozub.
Elan edilən qərara əsasən, Azərbaycan hökuməti jurnalistə mənəvi zərərə görə 13 min avro, digər xərclərə görə isə 1500 avro ödəməlidir.
Nə baş verib: S.Həzi 2014-cü il 30 avqustun da həbs edilib. O, Cinayət Məcəlləsinin 221.3-cü (xuliqanlıq, silah qismində istifadə edilən əşyaları tətbiq etməklə törədildikdə) maddəsi ilə ittiham olunaraq 2015-ci ilin 29 yanvarında Abşeron Rayon Məhkəməsinin qərarı ilə 5 il həbs cəzası alıb.
Jurnalist bu ittihamı rədd edərək, “Azadlıq” qəzetində hakimiyyəti tənqid edən məqalələr yazdığına və “Azərbaycan saatı” proqramında aparıcı olduğuna görə həbs olunduğunu bildirib.
“Amnesty International” təşkilatı S.Həzini vicdan məhbusu kimi tanıyıb.
