Yaponiyanın yeni imperatorunun taxta çıxması şərəfinə təşkil ediləcək dini mərasimlərin vergi ödəyiciləri tərəfindən maliyyələşdirilməsi narazılığa səbəb olub.
Sputnik Türkiyə yazır ki, İmperatorun oğlu şahzadə Akişino da məsələyə reaksiya verib. “Belə dini mərasimi dövlətin maliyyələşdirilməsinin nə qədər münasib olduğu mənə də maraqlıdır” – şahzadə deyib.
Artıq 240 nəfər Yaponiya vətəndaşı bununla bağlı məhkəməyə müraciət edib. Onların çoxu buddist rahiblər və xristian din adamlarıdır. Şikayətçilər belə bir addımın konstitusiyanın “din ilə dövlət işləri ayrıdır” maddəsinə zidd olduğunu bildirirlər.
Mərasim üçün büdcədən nə qədər pul ayrıldığı rəsmi olaraq açıqlanmayıb. Ancaq məhkəməyə müraciət edənlərdən biri – Koiçi Şin 28 il öncə, indiki imperator Akihitonun taxt mərasiminə 12.3 milyard yen, ( təxminən 108 milyon dollar) xərcləndiyini xatırladıb. O, bildirib ki, bu dəfə daha böyük məbləğdə vəsait xərclənəcəyi gözlənilir.
Hazırkı imperator Akihito 7 yanvar, 1989-cu ildən bəri əyləşdiyi taxtını 30 aprel 2019-cu ildə vəliəhd şahzadə Naruhitoya təhvil verəcək. İndidən qalmaqala səbəb olan Naruhitonun mayın 1-də taxta əyləşdikdən sonra biri oktyabrda, digəri isə noyabrda olmaqla daha iki mərasim təşkil etməyi planlaşdırılır.
