“Time” jurnalı ilin adamı nominasiyasına “The Guardians” adı altında topladıqları jurnalistləri layiq görüb. Bu jurnalistləri birləşdirən cəhət onların öz fikirlərinə və həqiqət axtarışına görə hədəfə çevrilmələridir.
Jurnalistləri Müdafiə Komitəsi 2017-ci ildə 262 işi sənədləşdirib:
“ABŞ-dan tutmuş Filippinə kimi sosial media və hökumət rəsmiləri saxta məlumat ötürürlər. Bu jurnalistlərin işi isə həqiqəti üzə çıxarmaq idi. Halbuki həqiqətin ardınca getmək onlar üçün təzyiq, həbs, hətta bəzən ölüm deməkdir”.
Camal Qaşıqçı – “Washington Post” qəzetinin köşə yazarı.
Camal Qaşıqçı Səudiyyə Ərəbistanı kralı və şahzadə Məhəmməd bin Salman haqda tənqidi yazılar qələmə alıb.
Jurnalist məhz bu yazılara görə oktyabr ayında İstanbuldakı Səudiyyə konsulluğunda vəhşicəsinə öldürülüb. Mərkəzi Kəşfiyyat Agentliyi (CIA) Salmanın öldürülməsi əmrini şahzadə Məhəmməd bin Salmanın verdiyini açıqlayıb. Buna baxmayaraq ABŞ prezidenti Donald Tramp hadisəyə bu sözlərlə münasibət bildirib:
“Ola bilsin şahzadə bu faciəli hadisədən xəbərdar olub. Bəlkə də xəbəri yox idi”.
“Capital Gazette” qurbanları: Con Maknamara, Rebeka Smit, Rob Hayaasen, Cerald Fişman və Uendi Uinters.
İyun ayında Merilənd əyalətində dörd jurnalist və bir satıcı kütləvi şəkildə atəşə tutuldu.Rəsmilər bu hücumu təşkil edənin cinayətdə günahlandırılan və daha öncə qəzeti məhkəməyə verən şəxs olduğunu açıqlayıb.
“Reuters”in həbs edilmiş jurnalistləri Wa Lone və Kyaw Soe Oo
Sentyabrda, Myanmarda hakim “Reuters”in 2 jurnalistini 7 il həbs cəzasına məhkum edib. Həbsin səbəbi onların Rohingya müsəlmanlarının kütləvi şəkildə öldürülmələri barədə məlumat vermələri idi. Müstəmləkə dövrünə aid qanunlara görə bu haqda məlumat ötürmək olmaz, çünki bu, dövlət sirri hesab olunur.
“Rappler “in qurucusu və icraçı direktoru Maria Ressa
CNN-nin sabiq hərbi müxbiri 2012-ci ildə “Rappler” onlayn xəbər saytını işə salıb və Filippin prezidenti Rodriqo Duterte haqqında tənqidi məlumat yayımlamağa başlayıb. Jurnalistlərin Müdafiə Komitəsinin məlumatına görə, Dutertenin Ədliyyə Nazirliyi saytın “hüquqi təcavüz kampaniyası” başlatdığını iddia edib.
