Həbsdə olan jurnalist Əfqan Muxtarlının ailə üzvləri ilə telefonla əlaqə saxlamağına maneə yaradılır. Jurnalistin həyat yoldaşı Leyla Mustafayeva Meydan TV-yə deyib ki, qanuna zidd olduğu halda onun telefon danşıqları dinlənir.
“Həbsdə saxlanılan şəxslərin hüquq və azadlıqlarının müdafiəsi haqqında” qanunda məhbusun telefon danışıqlarının dinlənilməsi qadağandır. 16 saylı Cəzaçəkmə Müəssisəsinin əməkdaşı qanunun tələbinə məhəl qoymadan jurnalist telefonla danışdığı zaman onun yanında dayanaraq, dinləyir.
L.Mustafayevanın sözlərinə görə, əvvəlkindən fərqli olaraq hazırda Əfqan Muxtarlıya kart vasitəsilə zəng edib danışmağa icazə verilmir. Zəng poçt vasitəsilə baş tutur ki, bunun da xərci iki dəfə çox olur.
“Ən biabırçı hadisə isə mənim səsimi yazıb, Əfqanın zəng vuranda ona avtomatik qoşmalarıdır. Ancaq həyat yoldaşım bunu hiss edəndən sonra etiraz edib” – Leyla Mustafayeva deyib.
Məhbus jurnalistə yaradılan digər maneə onun zəng üçün cəmi 1 dəfə cəhd etməyə icazə verilməyidir. Əfqan Muxtarlı qarşılaşdığı bu hallarla əlaqədar Ədliyyə Nazirliyinə şikayət hazırlasa da CÇM rəhbərliyi şikayətin göndərilməsinə imkan vermir.
Nə baş verib: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, ona dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.
Beynəlxalq hüquq müdafiə təşkilatları Əfqan Muxtarlını siyasi məhbus kimi tanıyır.
