Avropa İnsan Haqları Məhkəməsinin qərarına görə Azərbaycan hökuməti 11 jurnalist və hüquqşünasa 64 min avro kompensasiya ödəyəcək.
Meydan TV yazır ki, dekabrın 13-ü qəbul edilən qərara görə, şəxslərin Konvensiyaya 4 saylı protokolun 2-ci (sərbəst hərəkət etmək) və 13-cü (səmərəli müdafiə vasitələri) maddələrinin pozuntusu (Aynurə İmranova istisna olmaqla) tanınıb.
Ərizəçilər jurnalistlər Aytən Ələkbərova (Fərhadova), İzolda Ağayeva, Gülər Mehdizadə, Aynurə Heydərova, Aynurə İmranova, hüquqşünaslar Ənnağı Hacıbəyli, Rövşanə Rəhimova, ReAL Partiyasının Məclis başqanı Azər Qasımlı, hazırda fəaliyyəti dayandırılmış Beynəlxalq Universitetin rektoru Elşad Abdullayevin bacısı oğlu Azad Mursəliyev, Beynəlxalq Bankın sabiq sədri Cahangir Hacıyevin bacısı Əminə Hacıyeva və Dilarə Vəliyevadır.
Hər bir ərizəçiyə mənəvi zərərə görə 5000 avro, məhkəmə xərclərinə görə 1000 avro (Rövşanə Rəhimli və Əminə Hacıyeva istisna olmaqla) müəyyən edilib.
Niyə məhkəməyə ərizə verilib: Meydan TV-nin fəaliyyəti ilə bağlı aparılan cinayət təqibi çərçivəsində müstəqil jurnalistlər Gülər Mehdizadə, Aynur Elgünəş, Sevinc Vaqifqızı, Aytac Əhmədova, Natiq Cavadlı, Aynurə Heydərova, Aytən Ələkbərova (Fərhadova), İzolda Ağayevanın ölkədən çıxışına qadağa qoyulub.
Nə baş verib: Bir müddət əvvələ qədər dövlət qurumları ölkədən çıxış qadağasını rəsmi təsdiqləmirdi. Jurnalistlərdən birinin sorğusuna Ağır Cinayətlərə dair İşlər üzrə İstintaq İdarəsinin rəisi Eldar Əhmədovun cavabında giriş-çıxış qadağasının olduğu təsdiqlənib. Azərbaycanda Meydan TV İnternet-resursuna qarşı cinayət işi başlanıb. İş üzrə 15-dən artıq jurnalistin adı keçir.
