Əli Kərimli tərəfdarlı önündə çıxış edir. Foto: şəxsi arxiv / facebook

Bakı Apelyasiya Məhkəməsi bu gün AXCP sədri Əli Kərimlinin 2500 manat cərimələnməsi barədə Səbail Rayon Məhkəməsinin qərarından verilən şikayətə baxıb.

Meydan TV yazır ki, Əli Kərimlinin vəkili Fuad Ağayev onun saxlandığı gün həmin ərazidəki kameraların görüntülərinə baxılması barədə vəsatət qaldırıb, amma vəsatət təmin edilməyib.

Vəkil Səbail Rayon Məhkəməsinin qərarının qanunsuz və əsassız olduğunu bildirib və onun ləğv olunmasını istəyib. Hakim Qədim Babayev isə qərarı qüvvədə saxlayıb.

AXCP mətbuat xidmətindən bildirilib ki, Bakı Apelyasiya Məhkəməsinin qərarından sonra növbəti hüquqi addım Avropa Məhkəməsinə müraciət etmək olacaq.

Nə baş verib: Dünən Milli Dirçəliş gününü qeyd etmək məqsədi ilə AXCP və Milli Şura üzvləri Şəhidlər Xiyabanını ziyarət etmək istəyib. Polis mane olub və Cəmil Həsənli, Əli Kərimli başda olmaqla 53 fəalı Səbail rayon Polis İdarəsinə aparıb. Əli Kərimli İnzibati Xətalar Məcəlləsinin 513.1 (yığıncaq, mitinq, nümayiş, küçə yürüşləri və piketlərin təşkilinin, keçirilməsinin “Sərbəst toplaşmaq azadlığı haqqında” qanunla müəyyən edilmiş qaydasının toplantının təşkilatçısı tərəfindən pozulması) maddəsilə təqsirli bilinərək, cərimələnib.

Şərhini yaz

Şərhinizi yazın
Adınızı daxil edin