Türkiyənin hakim Ədalət və İnkişaf Partiyası (AKP) 31 mart seçkiləri ilə bağlı bayraq qənaəti etməyə qərar verib.
NTV Türkiyə yazır ki, ölkə başçısı Rəcəb Tayyib Ərdoğan seçkilər zamanı həddən artıq bayraqdan istifadə edildiyi üçün “vizual çirklilik” yarandığını dilə gətirib.
“Hər dəfə seçki dövründə küçələr partiya bayraqları ilə bəzənir. Biz bununla bağlı tənzimləmələr də hazırladıq, amma heç kim riayət etmədi. Bu, kampaniya formasında bir güc nümayişi olmağa davam etdi. Ancaq hazırda belə təbliğata ehtiyac yoxdur. Bunun çox primitiv olduğunu düşünürük. Bu cür köhnə tərzdəki kampaniya üsulları millətimizin də reaksiyasına səbəb olur. AKP olaraq 31 mart seçkilərindən başlayaraq, “vizual çirklilik” yaradan belə təbliğat üsullarını geridə qoyacağıq” – prezident deyib.
Hakim partiyanın Maliyyə və İnzibati İşlər üzrə məsul sədr müavini Vədat Dəmiröz digər partiyaları da eyni addımı atmağa çağırıb:
“Digər partiyalar da bu qərarı dəstəkləsə, bununla 40-50 milyon lirə qənaət ediləcək. Prezidentin o günkü çıxışından sonra bayraq sifarişlərini dayandırmışıq. Seçkilərdə bayraqlara xərclənən milyonlarla lirəni həm təşkilatımız üçün, həm də vətəndaşlara fərqli xidmətlər göstərmək üçün xərcləyəcəyik”.
