2018-ci il ərzində 4476 mühacir və qaçqın köç zamanı ölüb. Anadolu Agentliyi yazır ki, bu barədə Beynəlxalq Miqrasiya Təşkilatı (BMqT) məlumat yayıb.
Dünyanın müxtəlif yerlərindən olan yüz minlərlə insan ağır iqtisadi şərait, təbii fəlakət, siyasi təqib, zorakılıq və münaqişələrə görə öz ölkəsini tərk edənlərin əksəriyyəti ötən 4 ildə olduğu kimi ( 2 217 nəfər) Aralıq dənizində ölüb.
Miqrasiya edənlərin ümumi sayında bu il azalma müşahidə edilsə də, zorakılıq və münaqişələrə görə ölkəsindən qaçanların sayı ötən illə müqayisədə 30 faiz artıb. Cari ilin əvvəlindən Avropaya qanunsuz yolla 135 607 nəfər mühacirət edib.
Cənubi və Mərkəzi Amerika ölkələrindən yüz minlərlə insan siyasi təzyiq, aclıq, şiddət və qarşıdurmalara görə ABŞ və Kanadaya köç etməyin yollarını axtarıb. ABŞ prezidenti Donald Trampın imiqrant qəbulunun sayını azaltmaq üçün atdığı addımlardan sonra bu ölkələrdən kütləvi olaraq yola çıxan miqrantlar ABŞ sərhədlərinə gəliblər. Nəticədə 2018-ci ildə ABŞ sərhədləri miqrantların ən çox üz tutduğu yerlərdən birinə çevrilib.
