Azər Kazımzadə Əli Həsənova görə İlham Əliyevə müraciət edib

Gürcüstanda yaşayan azərbaycanlı jurnalist Azər Kazımzadə ölkə başçısı İlham Əliyevə müraciət edib.

Jurnalistin Facebook üzərindən ünvanladığı müraciətin səbəbi prezidentin ictimai-siyasi məsələlər üzrə köməkçisi Əli Həsənovun onu separatçılıqda ittiham etməyidir.

A.Kazımzadə yazır ki, haqqında deyilən ittihamlara səbəb jurnalistin siyasi fəal Vidadi İsgəndərlinin atasının məzarının təhqir olunması hadisəsi ilə bağlı Ə.Həsənova ünvanladığı suallardır.

“Hesab edirəm ki, Əli Həsənovun bu qəbuledilməz addımı atmaqda məqsədi birbaşa sizi, ailə üzvlərinizi söyüş hədəfinə gətirməkdir. Çox təəssüf ki, Həsənov buna nail ola bildi”.

Jurnalist müraciətində İlham Əliyevin rəhbərlik etdiyi hakimiyyətə qarşı olduğunu qeyd edir:

“Bu ölkədə bir klan var və onun da başında siz dayanırsınız. Mən bütövlükdə sizin hakimiyyətinizə qarşıyam və vicdanım rahatdır ki, hər hansı bir propoqanda kimi böhtan kampaniyasında iştirak etmirəm. Bu ölkənin fəlakəti sizin hakimiyyətinizdir”.

Nə baş verib: Prezidentin köməkçisi Əli Həsənov dekabrın 17-i rəsmi Facebook səhifəsində jurnalist haqqında yazıb:

“Azər Kazımzadə adlı şəxs xarici ölkələrdə fəaliyyət göstərən və etnik separatizm toxumu səpməyə çalışaraq Azərbaycan dövlətçiliyinə və milli birliyimizə həmişə sədaqət nümayiş etdirmiş talış xalqını çaşdırmaq istəyən Əlikram Hümbətov, İsmayıl Şabanov, Fəxrəddin Abbaszadələrin dəyirmanına su tökənlərdən biridir”.