Almaniyanın məşhur “Der Spiegel” jurnalının əməkdaşı Klaas Relotiusun saxta xeyriyyə kampaniyası təşkil etdiyi aşkarlanıb.
NTV Türkiyə yazır ki, o, şəxsi bank hesabı vasitəsilə Türkiyədə yaşayan yetim suriyalı uşaqlara kömək etmək adı ilə pul toplayıb.
K.Relotiusun keçmiş iş yoldaşı deyib ki, müxbir əvvəlcə suriyalı uşaqlar haqqında reportaj hazırlayıb, daha sonra xeyriyyə kampaniyasına başlayıb. Oxucuların bir çoxu bu kampaniyaya qoşulub və pul köçürüb, amma redaksiya bu aksiyadan xəbərsiz olub.
K.Relotisun nə qədər pul topladığı və bu pulları hara xərclədiyi məlum deyil.
Klaas Relotius kimdir: Jurnalın əməkdaşı bu ayın əvvəli suriyalılarla bağlı hazırladığı xəbərə görə Almaniyada ilin jurnalisti seçilib. Daha sonra “Der Spiegel” onun yazdığı 60 xəbərdən 14-nün “təxəyyül məhsulu” olduğunu açıqlayıb. Bundan sonra jurnalist istefa verib.
