Kevin Speysi 1 ildən sonra Frenk Andervud obrazında video müraciət yayıb

Aktyor Kevin Speysi seksual qısnamada ittiham ediləndən sonra ilk dəfə video-müraciət yayıb. 2017-ci ildən bəri ilk dəfə ictimaiyyət qarşısına çıxan aktyor “House of Cards” serialında canlandırdığı Frenk Andervud obrazında danışıb.

Speysi müraciətində izləyicilərin onun seriala geri qayıtmasını istəməyinə işarə edib:

“Mən bilirəm ki, siz istəyirsiz. Təbii onlar bizi ayırmağa çalışdı. Lakin biz daha güclü və nüfuzluyuq. Biz – Mən və Siz – hər şeyimizi bölüşmüşük. Mən sizə ən qorxulu günahlarımı danışmışam. Mən sizə insanların nələrə qadir olduğunu göstərmişəm. Öz səmimiyyətimlə sizi şoka salmışam. Bununla da mən sizə mesajlar ötürürdüm, sizin düşünmənizi istəyirdim”.

Nə baş verib: 2017-ci ilin oktyabrından etibarən aktyor Hollivudda “arzuolunmaz şəxsə” çevrilib. Səbəb isə onun 1992-ci ildə bir oğlana qarşı seksual qısnamalar etdiyi iddiası olub. Jurnalistlərin əldə etdiyi məlumata görə onun barəsində məhkəməyə 2019-cu ilin 7 yanvarında müraciət ediləcək.

Netflix-in cavabı: Həmin iddiadan sonra Netflix-in çəkdiyi “House of Cards” serialının baş rol ifaçısı Kevin Speysi filmdən uzaqlaşdırıldı. Serialın bu il yayımlanan son mövsümündə Frenk Andervud obrazının öldüyü göstərildi. Film tənqidçiləri son mövsümü bəyənməyib və çoxlu açıq sualların qaldığı bildirilib.