Mehman Hüseynov Ramana yolunun tikintisinə sərf edilən milyonlarla manat vəsaitin əvəzində keyfiyyətsiz yolun tikintisindən danışır. Foto: screenshot

Hazırda həbsdə olan bloqqer Mehman Hüseynova yenidən cinayət işi açılıb.

Report yazır ki, M.Hüseynov cəza çəkdiyi 14 saylı cəzaçəkmə müəssisəsində ümumi axtarış zamanı Rejim-nəzarət şöbəsinin böyük inspektoru, ədliyyə leytenantı Əli Abdalova xəsarət yetirib. Fiziki müqavimət göstərdiyi iddia olunan bloqqerin otaqda olan əşyaları sındırdığı deyilir. Onun üzərindən axtarış zamanı saxlanması qadağan olan 461 manat məbləğində pul tapıldığı bildirilir.

Prokurorluğun məlumatına görə, faktla bağlı Cinayət Məcəlləsinin 315.2-ci maddəsi (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) ilə cinayət işi başlanıb.

Mehman Hüseynov kimdir: Bloqqer 2017-ci ilin martın 3-də Suraxanı Rayon Məhkəməsinin qərarı ilə 2 il müddətinə azadlıqdan məhrum edilib. O, Cinayət Məcəlləsinin 147.2-ci (böhtan, ağır və ya xüsusilə ağır cinayətdə ittiham etməklə böhtan atma) maddəsi ilə ittiham olunub. Beynəlxalq təşkilatlar onu siyasi məhbus kimi tanıyır.

Şərhini yaz

Şərhinizi yazın
Adınızı daxil edin