AXCP fəalı Fuad Əhmədli “kars”a salınıb

AXCP Gənclər Təşkilatının üzvü Fuad Əhmədli 26 dekabrda “kars”a salınıb.

Meydan TV yazır ki, bu barədə məhbusun atası Zəfər Əhmədli məlumat verib.

Onun sözlərinə görə, oğlu ilə sonuncu dəfə dekabrın 24-ü telefonla əlaqə saxlayıb. Növbəti danışıq dünən planlaşdırılırdı, amma zəng gəlməyib:

“Sonra məlumat aldıq ki, 3 günlük “kars”a salınıb. Özü də sonuncu dəfə danışanda narahatlıqlar olduğunu demişdi, konkret olaraq, ona məhdudiyyətlər qoyulub. Dünən 16 saylı Cəzaçəkmə Müəssisəsinin əməliyyat şöbəsinə çağırıblar, sonra cəzalandırıldığı məlum olub. Ancaq səbəbini bilmirik”.

Z.Əhmədli düşünür ki, Siyasi Məhbusları Müdafiə Mərkəzinin bu ilin hesabatını açıqladığı gün oğlunun “kars”a salınması təsadüfi deyil.

“Hesabatda Penitensiar Xidmətin bir çox rəsmisinin adı var, bu da onları qıcıqlandırır. Bu amilin də nəticəsi ola bilər”.

Penitensiar Xidmət nə deyir: Xidmətin ictimaiyyətlə əlaqələr şöbəsinin rəhbəri Mehman Sadıqov hər hansı qərəzin olmadığını deyib:

“Sadəcə, məhbuslar qanuni intizam qaydalarına riayət etsinlər. Əgər məhkum ona qarşı qanunsuzluq olduğunu düşünürsə, şikayət etsin, araşdıraq, ya da məhkəməyə müraciət etsin”.

Nə baş verib: Fuad Əhmədli 2016-cı il avqustun 18-də saxlanılıb. Dövlət Təhlükəsizlik Xidməti və Baş Prokurorluğun birgə yaydığı məlumata görə, o, “Azərfon” MMC-də çalışdığı müddətdə abonentlərin şəxsi məlumatlarını üçüncü şəxsə ötürüb. Fuad Əhmədlinin mənzilində axtarış zamanı din xadimi Fətullah Gülənin çıxışlarının olduğu kitablar, CD-disklər tapıldığı bildirilir. Partiya fəalı Cinayət Məcəlləsinin 302-ci (əməliyyat-axtarış fəaliyyəti üzrə qanunvericiliyi pozma) və 308-ci (vəzifə səlahiyyətlərindən sui-istifadə) maddələri ilə ittiham edilir. O, 4 il müddətinə azadlıqdan məhrum edilib.

Şərhini yaz

Şərhinizi yazın
Adınızı daxil edin