Donald Tramp amerikalı əsgərlərlə görüşmək üçün İraqa səfər edib
Donald və Melanya Tramp Bağdadın qərbində yerləşən Ayn əl-Əsəd hərbi bazasında hərbçilərlə görüşür. Foto: AFP
ABŞ prezidenti Donald Tramp və həyat yoldaşı Melanya Tramp İraqa gözlənilməyən səfər edib.
BBC yazır ki, səfərin məqsədi amerikalı əsgərlərə göstərdikləri xidmətə və fədakarlıqlarına görə təşəkkür etmək olub.
Səfəri zamanı çıxış edən Tramp deyib ki, Amerikanın İraqdan çıxmaq planı yoxdur. ABŞ ordusunun Suriyadan çıxması qərarını isə belə əsaslandırıb:
“Çox adam mənlə razılaşar ki, bizim Suriyadakı missiyamız bitib. 8 il öncə oraya əsgər göndərəndə 3 ay qalmaq planlaşdırılmışdı. Ora getdik və illərlə qaldıq. İndi doğru olanı edirik”.
Prezident həm də deyib ki, ABŞ bundan sonra “Dünyanın polisi” vəzifəsini yerinə yetirməyəcək.
ABŞ prezidentinin İraq səfəri 3 saat çəkib.
ABŞ-ın İraqda 5 min əsgəri var. Onların vəzifəsi hökumətin İŞİD-ə qarşı mübarizəsinə kömək etməkdir.
