Mehman Hüseynov müddətsiz aclıq aksiyasına başlayıb

Həbsdə olan bloqqer Mehman Hüseynov evə zəng edib və 10 günlük “kars”a salındığını, təzyiqə məruz qaldığını deyib. Onun qardaşı Emin Hüseynovun Turan-a deyib ki, Mehman Hüseynov cəzaçəkmə müəssisəsinin əməkdaşını döyməsi barədə məlumat yalandır.

“Cinayət işi hələlik fakt üzrə açılıb – Mehmana ittiham irəli sürülməyib. Mehman vəkilləri ilə görüş tələb edir. Amma onun yanına vəkil buraxılmır. Mehman istintaq tədbirlərində iştirakdan və yeni cinayət işinin saxtalaşdırılmasına, ona qarşı təzyiqə və yanına vəkil buraxılmamasına etiraz əlaməti olaraq ifadə verməkdən imtina edib” – E.Hüseynov deyib.

Qardaşı onu da deyir ki, bloqqer baş verənlərə etiraz əlaməti olaraq müddətsiz aclıq aksiyasına başlayıb.

Nə baş verib: Penitensiar xidmətin dünən yaydığı məlumata görə, Mehman Hüseynov cəza çəkdiyi 14 saylı cəzaçəkmə müəssisəsində ümumi axtarış zamanı Rejim-nəzarət şöbəsinin böyük inspektoru, ədliyyə leytenantı Əli Abdalova xəsarət yetirib. Fiziki müqavimət göstərdiyi iddia olunan bloqqerin otaqda olan əşyaları sındırdığı deyilir. Cinayət Məcəlləsinin 315.2-ci maddəsi (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) ilə cinayət işi başlanıb.