Rusiya hökuməti bəzi xəstəliklərin müalicəsində istifadə edilən marixuana kimi narkotik bitkilərin tibbi məqsədlə yetişdirilməsinə icazə verməyi nəzərdə tutan qanun layihəsini təsdiqləyib.
Sputnik yazır ki, məqsəd Rusiyaya bu sahədə sanksiya tətbiq edən ölkələrdən asılılığı azaltmaqdır.
Rusiyanın səhiyyə naziri Veronika Skvortsova bu cür maddələri istehsal edən hər 10 istehsalçıdan 9-nun Rusiyaya sanksiya tətbiq edən ölkələrdə yerləşdiyini deyib:
“Xalqımızın güclü ağrı kəsicilərdən məhrum olmaması üçün biz özümüzü təmin etməliyik. Bunların hamısını – xam maddədən dərmana kimi özümüz istehsal etməliyik”.
Yaxın günlərdə Rusiya prezidenti Vladimir Putinin də layihəni təsdiqləyəcəyi gözlənilir.
Krımın ilhaqından sonra ABŞ, Avropa İttifaqı ölkələri və digər bir sıra ölkələr Rusiyaya sanksiya tətbiq edib.
