Xəzər Hərbi Tədqiqatlar İnstitutu 2018-ci ildə Azərbaycan və Ermənistan ordusunda ölən hərbi qulluqçuların statistikasını açıqlayıb. İnstitutun yayadığı məlumata görə, ötən il Azərbaycan ordusu 37 hərbçisini itirib ki, onlardan 6-ı Ermənistan tərəfinin açdığı atəş nəticəsində ölüb. Qarşı tərəfdə isə bu rəqəm 7-dir. Ümumilikdə isə 2018-ci il ərzində Ermənistan ordusunun 45 hərbçisi dünyasını dəyişib.
Qeyri-döyüş şəraitində həlak olan hərbçilərin ölüm halları müxtəlif səbəblərdən baş verib. Bunlar intihar, əsgər yoldaşı tərəfindən qətlə yetirilmə, xəstəlik, avto-qəza, mina partlayışı, təhlükəsizlik qaydalarını pozma və s.dir.
Azərbaycan ordusunda ölənlərin 32 nəfəri Müdafiə Nazirliyinin, 3 nəfər Dövlət Sərhəd Xidmətinin, 1 nəfər Daxili Qoşunların, 1 nəfərsə Hərbi Prokurorluğun hərbi qulluqçuları olublar. Müdafiə Nazirliyi ona aid olan 32 ölüm hadisəsinin 20-si barədə hər hansı açıqlama verməyib.
Ermənistan ordusunda isə ölənlərin hamısı Ermənistan Müdafiə Nazirliyinin (o cümlədən Azərbaycanın işğal altında olan Dağlıq Qarabağ ərazisindəki hərbi birləşmələrin) hərbi qulluqçuları olub. İnsidentlərin 24-ü Azərbaycanın Dağlıq Qarabağ və ona bitişik rayonların ərazisində, 21-i isə Ermənistan ərazisində baş verib.
Yaralanan və xəsarət alan hərbi qulluqçuların sayı isə Ermənistan ordusunda 25, Azərbaycan ordusunda isə 21 nəfərdir.
2017-ci illə müqayisə: 2017-ci ildə Azərbaycanın Təhlükəsizlik və Müdafiə sektorunda ən azı 59 hərbi qulluqçu ölüb. Onlardan 19 nəfəri döyüş, 40 nəfəri isə qeyri döyüş itkisi idi. Həmin il Ermənistanda ordusu da bərabər sayda itki verib. Ölən hərbçilərdən 22-si döyüş, 37 nəfəri isə qeyri-döyüş şəraitində həyatını itirib.
