Həbsdə olan bloqqer Mehman Hüseynova dəstək üçün ötən gün keçirilən aksiyada jurnalistlər və aktivistlər sutkalıq həbs edilib və cərimələnib. Aksiya iştirakçısı Əlimxan Ağayev (21 sutka), Səxavət Nəbiyev (20 sutka), jurnalistlər Nurlan Qəhrəmanlı (21 sutka) və Əfqan Sadıqov (22 sutka) İnzibati Xətalar Məcəlləsinin 513.2-ci maddəsi ilə təqsirli bilinərək həbs olunub.
İctimai fəal Fatimə Mövlamlı, Mətanət Mahmırzayeva və Pərvin Abışovanın hər biri 300 AZN, Fərid Abdinov isə 400 AZN məbləğində cərimələnib.
Nə baş verib: Ötən gün “Neftçilər” metrostantsiyası yaxınlığında bir qrup vətəndaş haqqında ikinci dəfə cinayət işi açılan bloqqer Mehman Hüseynova dəstək aksiyası keçiriblər. Aksiya iştirakçıları polisin təzyiqinə məruz qalıb və onların bir qismi polis bölməsinə aparılıb. Etirazçılarla yanaşı aksiyanı işıqlandıran jurnalistlər də saxlanılıb. Onların bir qismi dünən azadlığa buraxılıb.
