Bloqqer Mehman Hüseynova dəstək askiyasında həbs olunan etirazçılara və jurnalistlərə yaxınları ilə əlaqə saxlamağa imkan verilməyib. Bu barədə aksiya zamanı saxlanılan jurnalist Sevinc Vaqifqızı Facebook-da yazıb. Onun sözlərinə görə, jurnalist Nizami rayon 24-cü polis bölməsinin qarşısında Təcili Tibbi Yardım maşınını çəkən zaman polis telefonunu əlindən alıb.
Özümü də dartışdıra-dartışdıra bölməyə apardı. Polisin telefonumu eşələdiyini görüb tələb elədim ki, özümə qaytarsın, amma qaytarmadı. Polisə düşəndə saat 14:30 idi, polisdən çıxanda 22:40. Bu müddətdə saxlanılan 15 nəfərə valideynləri, dostları ilə əlaqə saxlayıb harada olduqlarını deməyə imkan vermədilər.
Aksiya iştirakçısı Gülnarə Akifqızı uşaq bağçasından uşağını götürməli olsa da ona bağçaya zəng etməyə icazə verilməyib. Həmçinin Pərvin Abışovanın uşağı evdə tək qalıb və polis xanımın evə kimisə göndərməyinə şərait yaratmayıb.
Buna da bax: Mehman Hüseynova görə etiraz aksiyası keçirilib, saxlanılanlar var
S.Vaqifqızının sözlərinə görə, 54 yaşlı Elmixan Ağayev isə polis zorakılığına məruz qalıb, onun qolu burulub. Səxavət Nəbiyəv və Fatimə Mövlamlı isə polis maşınında zorakılıq və təhqirlə üzləşib:
Polislər də deyirdi ki, qadınsınız, gedin evdə yeməyinizi bişirin, sizin aksiyada nə işiniz var. Xanımlar da dedi, Mehman 8 gündür acdır, ona görə boğazlarından yemək keçmir. Etiraz etmək isə onların təbii haqqıdır.
Buna da bax: Sosial şəbəkə istifadəçiləri Leyla Əliyevadan Mehman Hüseynovu azad etməyi tələb edir
Nə baş verib: Video-bloqqer Mehman Hüseynov həbs müddətinin bitməyinə iki ay qalmış yeni cinayət işində ittiham olunub. Penitensiar xidmətin yaydığı məlumata görə, o, 14 saylı cəzaçəkmə müəssisəsinin əməkdaşına xəsarət yetirib və otaqdakı əşyaları dağıdıb.
Cinayət Məcəlləsinin 317.2-ci (cəzaçəkmə müəssisəinin əməkdaşına təhlükəli şəkildə zor tətbiq etmək) maddəsi ilə cinayət işi qaldırılıb. İttiham təsdiqini taparsa, bloqqeri 5 ildən 7 ilə qədər həbs gözləyir.
