Tofiq Yaqublu. Foto: şəxsi arxiv / facebook

Müsavat Partiyasının Divan üzvü Tofiq Yaqublu həbsdə aclıq aksiyası keçirən bloqqer Mehman Hüseynova dəstək üçün aclıq aksiyasına başlayıb. Bu barədə o özü məlumat yayıb.

Partiya fəalının sözlərinə görə, o, aclıq aksiyasının ilk günlərini ayaq üstə qalan günləri isə Müsavat partiyasının qərargahında keçirəcək. Tofiq Yaqublu yalnız su içəcəyini bəyan edib.

* Milli Şuranın sədri Cəmil Həsənlinin yaydığı məlumata görə, Azərbaycan Xalq Cəbhəsi Partiyasının (AXCP) da bir üzvü Tofiq Məmmədov da Mehman Hüseynova dəstək məqsədilə aclıq aksiyasına başlayıb. Partiya üzvü artıq iki gündür ki, aksiya keçirir.

* Siyasi Məhbuslar Monitorinq Mərkəzinin rəhbəri Elşən Həsənov Mehman Hüseynova dəstək məqsədi ilə yanvarın 4-də aclıq aksiyasına başladığını bəyan edib.

* GAP üzvü Aslan Həmidli 5 yanvardan aclığa başlayıb və yalnız su içəcəyini açıqlayıb.

Buna da bax: Sosial şəbəkə istifadəçiləri İlham Əliyevin facebook hesabında Mehman Hüseynovu azad etməyi tələb edir

Nə baş verib: Bloqqer Mehman Hüseynov həbsdən çıxmağına iki ay qalmış yeni cinayət işində ittiham olunub. Penitensiar xidmətin yaydığı məlumata görə, bloqqer hazırda olduğu 14 saylı cəzaçəkmə müəssisəsinin əməkdaşına xəsarət yetirib, otaqda olan əşyaları dağıdıb. O, Cinayət Məcəlləsinin 317.2-ci (cəzaçəkmə müəssisəinin əməkdaşına təhlükəli şəkildə zor tətbiq etmək) maddəsi ilə cinayət işi qaldırılıb. İttiham təsdiqini taparsa, onu 5 ildən 7 ilə qədər həbs gözləyir.

* Mehman Hüseynov buna etiraz olaraq aclıq aksiyasına başlayıb. Artıq 9 gündür ki, aksiyanı davam edən bloqqer bu gün vəkillə görüşündə aclıq aksiyasını ittiham üzərindən götürülənə qədər davam etdirəcəyini deyib.