Həbsdə aclıq aksiyası keçirən bloqqer Mehman Hüseynovun vəkili Şəhla Hümbətova dünən onunla görüşüb. Vəkilin Facebook-da yazdığı məlumata görə, Mehman Hüseynovun səhhəti yaxşı deyil:
“Çox zəifdir, amma özü köməksiz ayaqda dayanır və yeriyə bilir. Rəngi çox ağarıb, dodaqları qup-qurudur, çatlayıb və göy rəngdədir. Gözlərini çətinliklə açıq saxlaya bilir, danışmaq da çətindir. Mədəsi ağrıyır, dedi ki, çox acı dad hiss edir ağzında və s. Az-az su içir. Həkim nəzarətindədir”.
Ş.Hümbətova ondan aclıq aksiyasını dayandırmağı xahiş etsə də bloqqer razılaşmayıb və xatırladıb ki, indiki həbs müddəti martın 2-də bitir. Mehman Hüseynov deyib:
2 martda mən buraxılmasam, artıq başqa cür hərəkət edəcəm. Ona görə yox ki, yeni həbsdən qorxuram, daha beş-altı il həbsdə qalmaq istəmirəm, zəifəm. Əksinə, indi özümü mübarizə üçün çox güclü hiss edirəm. Bu günə kimi yüzlərlə siyasi məhbus saxta ittihamlarla azadlığını qurban verib amma bu qurban heç nəyi dəyişməyib, vəziyyət oluduğu kimi qalır və daha pis olur. deməli biraz da irəli gedib, başqa, daha dəyərli qurban verilməlidir ki, bəlkə nəsə dəyişə.
Nə baş verib: Video-bloqqer Mehman Hüseynov həbs müddətinin bitməyinə iki ay qalmış yeni cinayət işində ittiham olunub. O, həbsxana əməkdaşına xəsarət yetirməkdə təqsirli bilinir. Bu ittihamla onu 5-7 il həbs gözləyir.
