Halsızlıq. Foto: pixabay

Bir müddətdir qonşu Gürcüstanda donuz qripi geniş yayılıb. Artıq ölkədə 158 nəfər “donuz qripi” adlandırılan H1N1 virusuna yoluxub və 9 nəfər ölüb. Virusun yayılmasına görə, Tbilisidə beş ilkin tibbi yardım müəssisəsi fövqəladə iş rejiminə keçib.

1

Donuz qripi nədir?

Bu xəstəlik ilk dəfə 2009-cu ildə ortaya çıxıb. Donuzlarda xəstəliyə səbəb olan mikroorqanizm (İnfluenza A virusu) dəyişiklik keçirib “İnfluenza tip A H1N1” virusuna çevrildikdən sonra insanlara da yoluxmağa başlayıb. Xəstəlik ilk dəfə Meksika və ABŞ-da peyda olub, daha sonra bir çox ölkəyə yayılıb.

2

Necə yoluxur?

Donuz qripi tənəffüs yolları ilə yoluxur. Xəstə insanla yaxın əlaqə, xəstənin öskürməsi və ya asqırması zamanı insandan insana keçir. Yoluxduqdan sonrakı 1-3 gün ərzində xəstəliyin əlamətləri üzə çıxmağa başlayır.

3

Donuz qripinin əlamətləri nələrdir?

Səbəbsiz yerə bədənin tempraturunun qalxması, quru öskürək, boğaz ağrısı, burnun tutulması və ya burun axıntısı, baş ağrısı, gözlərdə sulanma, əzələ ağrısı, halsızlıq xəstəliyin ilkin əlamətləridir. Xəstəlik bir çox hallarda ölümlə nəticələnir.

4

Necə qorunmaq olar?

Donuz qripindən qorunmaq üçün qapalı məkanları tez-tez havalandırmaq, insanların sıx olduğu yerlərdə çox vaxt keçirməmək vacibdir.

  • Əllər sabun və su ilə tez-tez yuyulmalıdır.
  • Ağız, burun və gözlərə çirkli əllərlə toxunmaq olmaz.
  • Xəstənin toxunduğu yerlər mütləq virusları öldürən mayelərlə təmizlənməlidir.

Hamilələr, uşaqlar və qocalar risk qrupunda yer alırlar. Ölkədə donuz qripi epidemisyası baş verdiyi halda risk qrupundakılara donuz qripi peyvəndinin vurulması tövsiyə edilir.

5

Azərbaycanda xəstəlik əleyhinə hansı tədbirlər görülür?

Azərbaycanın Səhiyyə Nazirliyi ölkədə mövsüm ərzində “donuz qripi”nə yoluxma hallarının qeydə alınmadığını açıqlayıb. Buna baxmayaraq, xəstəliyin Azərbaycana daxil olmaması üçün bir sıra tədbirlər görülür.

Azərtac yazır ki, “Azərbaycan Dəmir Yolları” QSC-nin ictimaiyyətlə əlaqələr şöbəsinin rəisi Sevinc Qədirova Gürcüstanda “donuz qripi”nin aşkarlanması səbəbindən qatarlarda dezinfeksiya işlərinin aparıldığını deyib:

Həkim-sanitar xidməti tərəfindən sərnişin qatarlarında gedən sərnişinlər və vaqon bələdçiləri arasında hər gün sanitariya maarifi işi aparırlar. Eləcə də hər reysqabağı vaqonlarda dezinfeksiya işləri görülür.

Şərhini yaz

Şərhinizi yazın
Adınızı daxil edin