Milli Şuranın Məhsul stadionunda mitinqi. Foto: Turan

Azərbaycan Xalq Cəbhəsi Partiyasının (AXCP) sədri Əli Kərimli Milli Şuranın mitinq keçirəcəyini elan edib. Partiya sədri bu barədə məlumatı jurnalist Sevinc Osmanqızına müsahibəsində açıqlayıb. Onun sözlərinə görə, mitinq yanvarın 19-u saat 15:00-dan 17:00-a qədər olacaq və bloqqer Mehman Hüseynova dəstək məqsədilə keçiriləcək.

Partiya sədrinin sözlərinə görə, Milli Şura və AXCP mitinqlə bağlı bu gün birgə qərar qəbul edib və artıq Bakı Şəhər İcra Hakimiyyətinə (BŞİH) müraciət göndərilib.

Hakimiyyətin mitinq müraciətinə baxılması üçün 5 iş gününün dolmaması bəhanəsi olmasın deyə biz bu gün iş vaxtı bitmədən rəsmi müraciətimizi etdik. Hökumətin manipulyasiya imkanı olmayacaq. Həmçinin gördük ki, Məhsul Stadionu ətrafında təmir imitasiyası yaradılıb, ona görə də biz müraciətdə alternativ yer də təklif etmişik.

Ə.Kərimli xatırladıb ki, bir müddət əvvəl Müsavat Partiyasının da Mehman Hüseynova dəstək mitinqinə icazə verilməyib. O, bütün siyasi qüvvələri bu mitinqdə iştirak etməyə çağırıb:

Ölkədəki represiyaya dayan “dur” demək istəyən bütün müxalif qüvvələr bu mitinqə qoşulsun.