Elçin İsmayıllı (jurnalist), Qiyas İbrahim (NİDAçı), Bayram Məmmədov (NİDAçı), Əhsən Nuruzadə (fəal) və İlkin Rüstəmzadə (NİDAçı). Foto: şəxsi arxiv / facebook

Əziz dostlar, dəyərli media və ictimaiyyət nümayəndələri!

Son vaxtlar hamının gözləri qarşısında çox dəhşətli proseslər baş verir. Hər ötən gün ölkəmiz sivil və demokratik dünyadan bir az daha uzaqlaşır. Şər üçbucağının əhatəsi və dəstəyi ilə bataqlığa doğru möhkəm addımlarla irəliləyir. Ölkəmizin və xalqımızın ali maraqlarının nəyi tələb etməsindən asılı olmayaraq, repressiyaların şiddəti daha da artır. Həbsdə olan siyasi məhbuslara və azadlıqda olan dissidentlərə qarşı başlayan və öz kulminasiyasını Mehman Hüseynova əlavə cinayət işinin açılmasında göstərən proses ölkəmizin artıq geri dönüşü olmayan bir yola qədəm qoyduğunu nümayiş etdirir.

Biz bunun artıq birlikdə müqavimət göstərilməsi gərəkən çox ciddi tendensiya olduğunu düşünürük. Əslində biz bu müqaviməti və atacağımız addımları xeyli əvvəldən planlaşdırsaq da ilk günlərdə aldığımız bir-birini istisna edən ziddiyyətli informasiyalar, eləcə də atacağımız addımları digər həbsxanalardakı siyasi məhbuslarla koordinasiyalı şəkildə təşkil etmək, mümkün qədər çox sayda, mümkün qədər çox siyasi məhbusun bu aksiyaya qoşulmasını təmin etmək üçün etdiyimiz cəhdlər bizi bir az ləngitdi. Bu müraciətin yazıldığı ana qədər bunun gec olub-olmamasıyla bağlı saatlarla çəkən mübahisələrdən sonra yekdilliklə bu qərara gəldik ki, bu bizə əngəl olmamalıdır. Biz başlayırıq. Digər siyasi məhbusların da qoşulacağına əminik.

Dəyərli siyasi məhbus dostlarımız!

Mehman Hüseynovun başına gətirilənlər, əgər bu gün birlik göstərməsək, sabah hamımızı gözləyir. Qurbanlıq qoyun kimi oturub kəsiləcəyimiz günü gözləsək sabah hamının başının altından bir narkotik, tank və s. tapacaqlar və ya biz də kimisə “döyəcəyik”. Əgər siz indiki məqamda susqunluğun müdrik, ehtiyatlı addım olduğunu düşünürsüzsə, qərbdən gələn reaksiyaların nəticələrini gözləyirsizsə, çarx arxaya fırlanır. Biz bu filmə dəqiqələrlə baxmışıq və bu, növbəti reaksiyaların nə ilə nəticələnəcəyini, necə sonlanacağını yaxşı bilirik. Tüstü-duman dağılandan sonra qərbdən kimlərsə gələcək, bir qismi dizləri üstə çökdürülmüş və ya xüsusi xidmət orqanlarının kuklasına çevrilmiş bir neçə siyasi məhbusun azadlığı müqabilində sövdələşmə əldə olunacaq. Sonra da çıxıb bu böyük humanizmi, belə möhtəşəm islahatı gurultuyla alqışlayacaqlar. Neft, avro və dollarlarından çemodanlarına doldurub qayıdacaqlar və naz-qəmzə ilə hakimiyyətə göz vurub yeni repressiyalar üçün yaşıl işıq yandıracaqlar.

Unutmayın, qərb təşkilatlarının Azərbaycanda satışa çıxarmadığı bircə dəyər, bircə prinsip qalmayıb. Və gurultulu insan haqları şüarları ilə başlayan qərbin bütün kampaniyaları həmişə rüsvayçı, bizi qaranlığı bir az da yaxınlaşdıran sonluqla bitib.

Biz ölkəmizin zülmətə qərq olmasına etiraz edirik! Biz repressiyalara etiraz edirik! Və susmayacağıq! Biz öz ölkəmizə sahib çıxırıq və onun işıqlı insanlarının həbsxanalarda qanqster kimi davranılmasına müqavimət göstərəcəyik. Mehman və digər hər kəs üçün bu gündən etibarən müddətsiz aclıq aksiyasına başlayırıq və bütün siyasi məhbusları bizə qoşulmağa çağırırıq!

Şərhini yaz

Şərhinizi yazın
Adınızı daxil edin