Fiziologiya və tibb üzrə Nobel mükafatı laureatı, DNT-nin ikili zəncir strukturunu ilk dəfə izah edən görkəmli bioloq Ceyms Uatson “Cold Spring Harbor” Laboratoriyasının (CSHL) fəxri rəhbəri adından, “Honorary Trustee” də daxil olmaqla bir sıra stipendiyalarından məhrum edilib.
AzLogos yazır ki, buna səbəb Uatsonun çoxsaylı irqçi çıxışları olub. Alim qara dərili insanların intellektual qabiliyyətlərinin daha aşağı olduğunu iddia edir.
“Cold Spring Harbor” Laboratoriyasının bəyanatında deyilir ki, C. Uatsonun fikirləri tamamilə qəbulolunmazdır, onların heç bir elmi əsası yoxdur və onların mövqeyi ilə qəti uzlaşmır.
Nə baş verib: 2007-ci ildə C. Uatson “The Times”a verdiyi müsahibəsində deyib ki, o, Afrikanın gələcəyini qaranlıq görür, çünki bütün sosial siyasət afro-amerikanların ağdərililərlə eyni intellektual qabiliyyətlərə malik olması üzərində qurulub. Halbuki, bütün tədqiqatlar bunun belə olmadığını göstərir. Bu müsahibədən sonra Uatson rəhbər vəzifələrdən qovulub.
O, 2014-cü ildə öz Nobel medalını hərracda sataraq əldə etdiyi pulu elmi tədqiqat institutlarının və universitetlərin dəstəklənməsinə sərf edib.
