“Brexit” sazişinin parlamentdən rədd cavabı almasından sonra Böyük Britaniya baş naziri Tereza Mey çətin vəziyyətdə qalıb.
NTV yazır ki, T.Mey 3 gün ərzində hökumətin “B” (alternativ plan) planını açıqlamalıdır.
Digər tərəfdən ölkə müxalifətinin əsas təmsilçisi olan “İşçi Partiyası” Tereza Mey hökumətinə qarşı etimadsızlıq səsverməsi tələb edib.
Səsvermənin bu gün baş tutacağı gözlənilir.
Baş nazir Tereza Meyin Avropa Birliyi ilə razılaşdırdığı “Brexit” sazişinin parlamentdən keçməməsini “İşçi Partiyası”nın lideri Ceremi Korbin belə dəyərləndirib:
Bu razılaşmanın bu gecə rədd edilməsinin ən yaxşı nəticəsi ümumxalq səsverməsi olacaq. Tereza Mey hökuməti məğlub oldu.
T.Meyin parlamentdə əldə etdiyi nəticəni ölkə mətbuatı da “tarixi məğlubiyyət” kimi qiymətləndirib.
AB-nin mətbuat katibinin müavini Preben Aaman isə deyib ki, bu səsvermə ilə Böyük Britaniyanın Avropa Birliyindən sazişsiz ayrılmaq ehtimalı artıb:
Bunu istəməsək də, hazırlıq işlərinə başlayacağıq.
Bildirilir ki, hökumətini Şimali İrlandiyanın Demokratik Birlik Partiyasının (DUP) dəstəyi ilə yaradan T.Meyin bu günki səsvermədəki taleyi də bu partiyadan asılı olacaq.
Tereza Mey 2017-ci ildə baş tutan seçkidə parlamentdəki üstünlüyünü itirib. 650 nəfərlik Böyük Britaniya parlamentində hökuməti qura bilmək üçün 326 millət vəkilinə ehtiyac var. Tereza Meyin partiyası isə parlamentdə 318 millət vəkili ilə təmsil oluna bilib. Buna görə də o, hökuməti DUP-un 10 millət vəkilinin dəstəyi ilə qurub.
Nə baş verib: Dünən yerli vaxtla saat 19:00-da Böyük Britaniya parlamentində ölkənin Avropa İttifaqından ayrılma prosesinin formatını müəyyənləşdirəcək “Brexit” sazişi üzrə səsvermə keçirilib. Böyük Britaniya parlamenti “Brexit” saizişini 202 səsə qarşılıq 432 səs çoxluğu ilə rədd edib.
