Əfqan Muxtarlı. Foto: Elmir Mirzoyev

Həbsdə olan araşdırmaçı jurnalist Əfqan Muxtarlı həyat yoldaşı Leyla Mustafayevaya zəng edib və bir həftədən çoxdur ki, təxribata çəkildiyini deyib.

Bu barədə Leyla Mustafayeva özü məlumat yayıb. Onun sözlərinə görə, Əfqan Muxtarlı telefon danışıqları zamanı deyi ki, hazırda saxlandığı 16 saylı cəzaçəkmə müəssisəsində ona qarşı təzyiqlər artıb. Ona yemək və dərman gətirən Samir Əsədli ilə telefon danışığı da qadağan edilib. Jurnalist ona oxumaq istədiyi kitabların və ad günündə göndərilən məktub və açıqcaların verilmədiyindən də şikayətlənib:

“Bir həftədən çoxdur, məni təxribata çəkirlər. Bu işdə cəzaçəkmə müəssisəsinin rəhbəri Şahin Həsənov və Kamil adlı inspektor fəallıq göstərir. Məmməd İbrahimi də burda 16 saylı cəzaçəkmə müəssisəsində şərləyib əlavə cinayət işi açmışdılar. Ehtimal var ki, eyni planı mənə də tətbiq etsinlər.

Həbsxanadakı məhbuslara sifarişlə suvenir gəmilər düzəltdirib dostlarıma göndərirdim. Cəzaçəkmə müəssisəsinin rəhbərliyi həmin məhbuslara da təzyiq edib. Həmin məhbuslar suvenir gəmilər üçün verdiyim sifarişi və pulu geri qaytarıblar”.

Ə.Muxtarlı əlavə edib ki, Mehman Hüseynova açılan yeni cinayət işinə xitam verilsə də digər siyasi məhbusların azad edilməsi üçün cəhdləri davam etdirmək lazımdır.

Nə baş verib: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.

Şərhini yaz

Şərhinizi yazın
Adınızı daxil edin