2008-ci ildə Cənubi Afrikada tapılan “Australopithecus Sediba”ya aid iki fosillə bağlı müzakirələrə nəhayət son qoyulub.
Euronews yazır ki, alimlər bu fosilin 3 milyon il əvvəl yaşamış “Lucy” (Australopithecus afarensis) ilə 1,5 milyon il əvvəl mövcud olan “Yararlı adam” (Homo Habilis) arasındakı əksik halqa olduğu qənaətinə gəliblər.
Alimlər 10 il sonra üzə çıxan bu fakta əsaslanaraq bildirirlər ki, bundan 2 milyon il əvvəl ilk insanlar eynilə primatlar kimi ağaclardan sallaşırdı.
Ən son texnologiyanın məhsulu olan cihazlarla xüsusilə də əllər və qollarda aparılan tədqiqatlar göstərib ki, həmin dövrdə insanlar vaxtlarının böyük qismini ağaclarda keçiriblər. Alimlər ilk insanların əsasən qida toplamaq və vəhşi heyvanlardan qorunmaq üçün ağaclara üz tutduğunu düşünür.
Bu fosillə yanaşı alimlər 20 il əvvəl tapılan “Australopithecus”a məxsus fosili də (Kiçik ayaq”) təkamülün əksik halqası kimi qiymətləndiriblər.
