Həbsdəki bloqqer Mehman Hüseynov barəsindəki əlavə cinayət işinin icraatına xitam verilib.
Baş Prokurorluğun Mətbuat xidmətinin yaydığı məlumatda qeyd edilir ki, Prezident İlham Əliyevin tövsiyələrindən sonra istintaq orqanı tərəfindən M.Hüseynovun gənc olduğu, cəza çəkdiyi müddətdə intizam məsuliyyətinə cəlb edilmədiyi, islah olunma yoluna qədəm qoyduğu, ailəsində qayğıya ehtiyacı olan yaşlı və tək yaşayan atasının olduğu, törətdiyi cinayətin az ağır cinayətlər kateqoriyasına aid olmaqla, hazırda onun əməlinin və şəxsiyyətinin cəmiyyət üçün təhlükəli olmadığı nəzərə alınaraq, M.Hüseynov barəsindəki cinayət işinin icraatına xitam verilib.
Nə baş verib: Dünən Mehman Hüseynov prezident İlham Əliyevə müraciət edərək onun işinin düzgün aparılmasına göstəriş verməsini xahiş edib. Axşam saatlarında isə İlham Əliyev bloqqerin işində humanizm prinsipinin önə çəkilməsini, araşdırmanın obyektiv və ədalətli olması üçün qanunla nəzərdə tutulan bütün zəruri tədbirlərin görülməsini Baş prokurora tövsiyə edib.
Daha tez azad edilə bilərmi: Bloqqerin vəkilləri ötən ilin payızında vaxtından əvvəl azadlığa buraxılması üçün Qaradağ rayon Məhkəməsinə müraciət etmişdilər. Həmin zaman M.Hüseynovun saxlanıldığı 14 saylı cəzaçəkmə müəssisəsinin rəhbərliyi bloqqerin islah olunmadığı barədə rəy vermişdi. Məhkəmə də bu rəyə əsaslanaraq Mehmanı sərbəst buraxmamışdı. Bakı Apelyasiya Məhkəməsi də qərarı qüvvədə saxlayıb.
M.Hüseynovun vəkili Fuad Ağayev “Qafqazinfo”ya açıqlamasında bildirib ki, apelyasiya instansiyasının həmin qərarından kassasiya şikayəti veriblər. Amma Ali Məhkəmə işə baxılması gününü və hakimi hələ təyin etməyib. Belə ki, M.Hüseynov martın 2-ni gözləmədən, Ali Məhkəmənin qərarı ilə azadlığa buraxıla bilər.
