Aqil Məhərrəmli. Foto: Facebook

Rusiyada yaşayan iş adamı, Gədəbəyin keçmiş icra başçısı Saleh Rüstəmli, qardaşı oğlu Vidadi Rüstəmli, AXCP Rəyasət Heyətinin üzvü Aqil Məhərrəmli, Gənclər Komitəsi Məclisinin sədri Ruslan Nəsirli və partiyanın Nərimanov şöbəsinin sədri Babək Həsənovun məhkəməsi yanvarın 22-də davam etdirilib.

Meydan TV yazır ki, Bakı Ağır Cinayətlər Məhkəməsində keçirilən prosesdə təqsirləndirilən şəxslər Aqil Məhərrəmli və Ruslan Nəsirli ifadə veriblər. Onlar mayın 25-də həbsləri və Mütəşəkkil Cinayətkarlığa Qarşı Mübarizə İdarəsində işgəncəyə məruz qalmaları haqda danışıblar.

A.Məhərrəmlinin sözlərinə görə, işgəncə otağında onun ayağından vurub yıxaraq, əlləri qandallı vəziyyətdə dizüstə oturdub, ardınca da döyməyə başlayıblar. Bu üsulla işgəncə nəticə verməyəndə bədəninə tok buraxıblar:

“Baş və orta barmağıma naqil bağlayıb, tok verdilər. Əvvəl dözdüm, sonra toku artırdılar, davamlı elədilər. Gördüm, dözmək mümkün deyil, dedim ki, yaxşı, Saleh Rüstəmlidən pul almışam, amma Əli Kərimliyə verməmişəm.Axırda toku o qədər artırdılar ki, dirsəyə qədər qollarımdakı kapilyarlar partladı. Bundan sonra məndən öz istədiyim vəkildən imtina ərizəsi aldılar, telefonun kodunu dedim. Onların tələb etdiyi formada danışdım, videoya çəkdilər”.

A.Məhərrəmli bildirib ki, ona bir neçə dəfə Vidadi Rüstəmlidən zərfdən külli miqdarda dollar alıb, gətirib Əli Kərimliyə çatdırması barədə ifadəyə imza atdırıblar. Ona və Vidadi Rüstəmliyə işgəncə verib, hər ikisini üzləşdiriblər:

“İkimiz də robot kimi bizdən tələb olunanları deyirdik…”

Digər təqsirləndirilən cəbhəçi Ruslan Nəsirli bildirib ki, onu işgəncə ilə hədələyib, istənilən halda, tələb olunan ifadəyə qol çəkdirəcəklərini deyiblər.

Məhkəmə prosesi yanvarın 23-nə qədər təxirə salınıb.

Nə baş verib: A.Məhərrəmli, R.Nəsirli və B.Həsənov mayın 25-də həbs olunub. Onların həbsi barədə Baş Prokurorluq və Daxili İşlər Nazirliyi birgə açıqlama yayaraq, AXCP funksionerlərini onlardan təxminən iki həftə öncə həbs olunmuş Gədəbəy rayonunun keçmiş icra başçısı Saleh Rüstəmli ilə birlikdə çirkli pul vəsaitlərini leqallaşdırmaqda ittiham edib.

Şərhini yaz

Şərhinizi yazın
Adınızı daxil edin