Venesuelada hökumət əleyhinə keçirilən nümayişlər zamanı baş verən toqquşmalarda azı 16 nəfər ölüb, 70-dən çox insan saxlanılıb.
“El Nacional” qəzeti yazır ki, etirazçılarla təhlükəsizlik qüvvələri arasında toqquşmalar zamanı ölüm halları Amasonas, Barinas, Bolivar, Portuqesa və Taçira ştatlarında, həmçinin ölkə paytaxtı Karakasda qeydə alınıb.
Karabobo ştatının Valensiya şəhərində bir qrup polis əməkdaşı da etiraz aksiyasına qoşulub.
Venesuela prezidenti Nikolas Maduro isə ölkəsinin Birləşmiş Ştatlarla diplomatik əlaqələri kəsdiyini bəyan edib:
“Mən ABŞ-ın diplomatik korpusuna ölkəni tərk etmək üçün 72 saat vaxt verirəm”.
Nə baş verib: Venesuelanın bir çox şəhərini etiraz aksiyalaır bürüyüb. Venesuela parlamentinin spikeri və müxalifət lideri Xuan Quaydo özünü prezident vəzifələrinin icraçısı elan edib. ABŞ prezidenti Donald Tramp və Gürcüstan Xuan Quaydonu rəsmi olaraq prezident vəzifələrinin müvəqqəti icraçısı kimi tanıyıb. Rusiya və Türkiyə isə Maduronu dəstəkləyir.
