Müsavat Partiyasının üzvü, hazırda həbsdə olan siyasi fəal Azad Həsənov ailəsi ilə telefonla danışıb.
Bu barədə Mikroskop-a onun həyat yoldaşı Təranə Həsənova məlumat verib. Onun sözlərinə görə, danışıq internet üzərindən olduğu üçün çətinliklə baş tutub:
“Bu gün anamgilin ev telefonuna zəng edib, anam da mənə WhatsAppdan zəng etdi, bu formada danışa bildik. Vəziyyəti yaxşı idi, heç bir şeydən şikayəti yoxdur. Hamıya salam dedi və hamını mübarizəyə səslədi”.
Siyasi fəalın xanımının sözlərinə görə, həbs olunandan bəri ilk dəfədir ki, həyat yoldaşı ilə əlaqə saxlaya bilib.
Nə baş verib: Litvada mühacir statusu olan A.Həsənov 2018-ci il oktyabrın 11-də ağır vəziyyətdə olan atasını görmək üçün Bakıya qayıdıb və bundan bir neçə saat sonra yaşadığı Hövsan qəsəbəsində həbs edilib. O, külli miqdarda narkotik maddə satmaqda ittiham olunur.
