AXCP-yə və partiyanın sədri Əli Kərimliyə pul göndərməkdə ittiham edilən Gədəbəy rayonunun keçmiş icra başçısı Saleh Rüstəmov yanvarın 23-də Bakı Ağır Cinayətlər Məhkəməsində ifadə verib.
Meydan TV yazır ki, döyülə-döyülə Şəmkir Rayon Polis Şöbəsinə aparıldığını, orada gödəkçəsinin cibinə polislərin heroin atıldığını deyən S.Rüstəmovun sözlərinə görə, onu qadınlı-kişili bütün qohum-əqrəbasını da tutub polis şöbəsinə gətirməklə hədələyiblər. Bundan sonra o, üzərindən 30 qram heroin tapılması barədə protokolu imzalayıb.
S.Rüstəmov bildirib ki, tutularkən üzərində 7 min rus rublu, 1000 manat və 50 dollar pulunu götürüblər. O pullardan ancaq 50 dolları qaytarıblar.
Buna da bax: AXCP üzvləri işgəncə altında ifadə verdiklərini deyirlər
S.Rüstəmov bildirib ki, siyasi məhbusların ailələrinə yardım üçün 300-500 dollar göndərib. Sonradan başqa azərbaycanlılar da bu təşəbbüsə qoşulub. Ümumilikdə 12 azərbaycanlının göndərdiyi ən çox məbləğ 1200 dollar olub. Lakin Mütəşəkkil Cinayətkarlığa Qarşı Mübarizə İdarəsində ondan hər ay Əli Kərimliyə 25-30 min dollar göndərməsi barədə ifadəyə imza atmağı tələb ediblər. Onun sözlərinə görə, işgəncələr nəticəsində belə ifadə verib:
“Adamın üzünə tüpürürlər, ən pis ifadələri işlədirlər. Axırda dedim ki, nə istəyirsiz yazım, deyim, ancaq o adamları çağırmayın. Qohum-əqrəbaya da dəyməyin. Çünki qardaşım oğlu Vidadinin səsini onun qışqırtısından tanımışdım”.
Məhkəmə yanvarın 25-nə qədər təxirə salınıb.
Nə baş verib: Baş Prokurorluq və Daxili İşlər Nazirliyi birgə məlumat yayaraq, S.Rüstəmov, onun qardaşı oğlu Vidadi Rüstəmli, AXCP funksionerləri Babək Həsənov, Aqil Məhərrəmli və Ruslan Nəsirlini cinayət yoluyla əldə olunmuş vəsaitlərin leqallaşdırılmasında ittiham edib. İddia olunur ki, S.Rüstəmov Rusiyadan AXCP-yə pul göndərib, həbs edilmiş cəbhəçilər də həmin vəsaitləri alıb partiya rəhbərinə çatdırıblar. İttihamda söhbət 412 min dollardan gedir.
