DİN həbsxanada işgəncə barədə deyilənlərə münasibət bildirib

Azərbaycan Xalq Cəbhəsi Partiyasını (AXCP) maliyyələşdirməkdə ittiham olunan keçmiş icra başçısı Saleh Rüstəmli və bir neçə partiya üzvünün işgəncəyə məruz qaldıqları ilə bağlı məhkəmədə verdikləri ifadəylə bağlı rəsmi açıqlama verilib.

Azadlıq Radiosu yazır ki, Daxili İşlər Nazirliyi mətbuat xidmətinin şöbə rəisi Orxan Mansurzadə indiki halda sözügedən iddialara münasibət bildirməyin məhkəməyə təzyiq sayıla biləcəyini deyib:

Məhkəmə zamanı hər iki tərəf öz xeyrinə fikir səsləndirə bilər. Buna da məhkəmə baxışı zamanı baxıla bilər, vəssalam. Məhkəmə gedə-gedə orda səslənən fikirlərə münasibət bildirməyimiz mümkün deyil. Bu, həm etik, həm qanuni baxımdan düz deyil. Məhkəmə gedişatına müdaxilə kimi qiymətləndirilə bilər.

Məhkəmədə işgəncə haqda nə deyilib?

Keçmiş icra başçısı Saleh Rüstəmli:

Döyürdülər, tüpürürdülər, ən pis söyüşləri söyürdülər. Boynumun arxasından vurub, sürüyə-sürüyə apardılar. Bu zalda qohumlarım var, nələr elədiklərini danışıb, onların əzab çəkməsini istəmirəm. Elə elədilər ki, dedim, nəyə istəyirsiz, qol çəkəcəm.

Nə baş verib: Çirkli pulları leqallaşdırmaqda, Azərbaycan Xalq Cəbhəsi Partiyasını (AXCP) maliyyələşdirməkdə ittiham olunan keçmiş icra başçısı Saleh Rüstəmli və bir neçə partiya üzvü məhkəmədə işgəncəyə məruz qaldıqlarını bildiriblər. Onların işgəncə haqda söylədiklərinə müxalif qüvvələrin 19 yanvar mitinqində də toxunulub, eləcə də bu məsələ sosial mediada müzakirələrə yol açıb.

Şərhini yaz

Şərhinizi yazın
Adınızı daxil edin