Prezident İlham Əliyev şəhid ailələri ilə bağlı daha bir fərman verib.
Fərmanda prezidentin ötən il 19 apreldə imzaladığı və şəhid ailələrinə birdəfəlik müavinətin verilməsini nəzərdə tutan fərmana dəyişiklik edilməsi barədə maddələr yer alıb. Dəyişikliyə əsasən daxili işlər orqanlarının şəhid əməkdaşlarının da vərəsələrinə 11 min manat sığorta ödənişi veriləcək.
Fərmanın imzalanmasından bir neçə saat əvvəl İlham Əliyev Prezident Sarayında şəhid ailələri ilə görüşüb. Fərman haqqında ilk məlumat da elə həmin görüş zamanı verilib.
Yeni fərmanla birdəfəlik ödəmənin əhatə dairəsi daha da genişlənib və artıq 12268 şəhidin vərəsələrini əhatə edir. Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən bildirilib ki, bunun üçün ümumilikdə 135 milyon manat vəsait nəzərdə tutulur.
