Avropa Parlamentində səsvermə. Foto: Vincent Kessler

Avropa Parlamenti Xuan Quaydonun qanuni rəhbər kimi tanınması ilə bağlı çağırış bəyannaməsini qəbul edib.

Sputnik yazır ki, parlamentin iclasında 439 nəfər sənədin lehinə, 104-ü əleyhinə səs verib. 88 nəfər isə neytral qalıb.

Avropa Parlamentinin sədri Antonio Tayani səsvermədən sonra çıxış edərək deyib:

“Avropa Parlamentinin Quaydonu Venesuelanın qanuni prezidenti kimi tanıdığını elan edirəm”.

Avropa Parlamenti Avropa İttifaqı ölkələrini də oxşar addım atmağa çağırıb. Parlament üzvləri artıq qeyri-qanuni lider hesab edilən Nikolas Maduro hökumətini təmsil edən səfirlər əvəzinə X.Quaydonun təyin etdiyi səfirlərin Avropa İttifaqı ölkələrində akkreditasiya edilməsinin vacibliyini də vurğulayıblar.

Nə baş verib: Venesuela parlamentinin sədri və müxalifət lideri X.Quaydo yanvarın 23-də Karakasda mitinq zamanı özünü prezident elan edib. Başda ABŞ olmaqla artıq bir çox ölkə X.Quaydonu qanuni rəhbər kimi tanıyıb.

Şərhini yaz

Şərhinizi yazın
Adınızı daxil edin