Əfqan Muxtarlı Gürcüstandan oğurlanaraq Azərbaycanda məhkəməyə gətirilərkən. Foto: Reuters

Həbsdə olan araşdırmaçı jurnalist Əfqan Muxtarlının qardaşı Ramazan Muxtarlı onun müəssisədə şikayətləndiyi problemlərlə bağlı məlumat yayıb.

Əfqan Muxtarlı qardaşına deyib ki, 16 saylı cəzaçəkmə müəssisəsinə istilik sutka ərzində cəmi 4 saat verilir, o da gecə vaxtlarında.

Nəticədə məhbuslar arasında xəstəlik baş alıb gedir. Məhbusların çoxu xəstədir, öskürək, qızdırma adi hala cevrilib.Tibbi xidmət isə yoxdur. Məhbuslara verilən yemək də olduqca keyfiyyətsizdir. Lazımınca qida ilə təmin olunmurlar. Başqa bir problem məhbusların saxlanma şəraiti ilə bağlıdır. Məhbus çox, yataq yeri az. Yer çatmadığından növbə ilə yatırlar. Bu isə sutka ərzində 4 saat yuxu deməkdir.

Penitensiar Xidmətin ictimaiyyətlə əlaqələr şöbəsinin müdiri Mehman Sadıxov Meydan TV-yə açıqlamasında iddianı təkzib edib.

O deyib ki, cəzaçəkmə müəssisəsində kombi sistemi quraşdırılıb və fasiləsiz istilik verilir. Qidaların keyfiyyətsiz olması və məhbusların çox olması haqda deyilənləri də doğru saymır:

Hətta diabetli xəstələr üçün ayrıca qida verilir. Orda saxlanılan məhbusların sayı saxlanma limitindən qat-qat aşağıdır.

Nə baş verib: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.

Başqa təzyiqlər: Jurnalistə həm də həyat yoldaşı Leyla Mustafayeva ilə telefon əlaqəsi saxlamağa maneələr yaradılır. Telefon xəttinin “Aztelecom” tərəfindən borc olduğuna görə xaricə çıxışlarının bağlandığı bildiriblir. Amma borc barədə “Aztelecom” tərəfdən heç bir bildiriş gəlməyib.

Şərhini yaz

Şərhinizi yazın
Adınızı daxil edin