“Freedom House”un yeni hesabatı: 68 ölkədə demokratiya geriləyib

Freedom House demokratiya və insan haqları təşkilatı Dünyada Azadlıq 2019 (Freedom in the World 2019) hesabatını açıqlayıb.

Azadlıq Radiosu yazır ki, hesabatda 195 ölkədə demokratiya və insan haqlarının vəziyyəti təhlil edilib.

Hesabata əsasən Birləşmiş Ştatlardakı vəziyyət üzərində dayanıb. Bildirilib ki, Amerika demokratiyasının hazırda üzləşdiyi çətinliklər bütün dünyada siyasi hüquqları və vətəndaş azadlıqlarını sarsıdır. Amerikada demokratiyanın dərəcəsi Yunanıstan, Xorvatiya və Monqolustanın səviyyəsinə enib.

Dünyanın başqa yerlərində də avtoritarlıq demokratiyaya üstün gəlməyə başlayıb. 2018-ci il ərzində dünyanın 68 ölkəsində demokratiya geriləyib, yalnız 50 ölkədə irəliləyiş qeydə alınıb.
Son 13 ildə qlobal azadlıqlar tənəzzül etməkdə davam edib. Bu dövr ərzində azad olmayan ölkələr kateqoriyası genişlənib.

Hesabatda qeyd olunur ki, getdikcə artan sayda ölkə mühacir, sürgündə olan və diaspora üzvü olan keçmiş soydaşların hədəflənməsi ilə məşğul olub. Təşkilat keçmiş həmvətənləri xaricdə hədəfləyən və onlardan qisas alan 24 ölkəni müəyyənləşdirib. Bunların arasında Rusiya, Çin, İran, Türkiyə və Səudiyyə Ərəbistanı da var.

Azərbaycan azad olmayan ölkələr kateqoriyasında 

Hesabatda Özbəkistan və Ermənistanda gedən demokratikləşmə prosesləri təqdir olunur. Əksinə Rusiya və Azərbaycan hesabatın bir neçə yerində tənqid edilir.

Qeyd olunur ki, Rusiya prezidenti Vladimir Putin və Azərbaycan prezidenti İlham Əliyev müstəqil media və vətəndaş cəmiyyətinə qarşı repressiyalardan, dövlət resurlarından sui-istifadədən və həqiqi siyasi opponentlərin təqibindən, habelə birbaşa fırıldaqdan faydalanmaqla növbəti müddətə prezidentliklərini təmin ediblər.

Hesabata görə Azərbaycan 2019-cu ildə də azad olmayan ölkələr kateqoriyasında qalır. Onun Cənubi Qafqazdakı iki qonşusu – Ermənistan və Gürcüstan qismən azad ölkələr hesab olunub.

Şərhini yaz

Şərhinizi yazın
Adınızı daxil edin