Azərbaycan Xalq Cəbhəsi Partiyasının (AXCP) Şamaxı rayon şöbəsinin sədri Zahir Məmmədli fevralın 5-də saxlanılıb.
Azadlıq Radiosu yazır ki, bu barədə AXCP-dən məlumat verilib.
Məlumatda bildirilir ki, elə həmin gün də o, rayon məhkəməsinin qərarı ilə 13 sutka inzibati həbs cəzası alıb.
Z.Məmmədli İnzibati Xətalar Məcəlləsinin 535.1-ci (polisin qanuni əmrinə tabe olmamaq) maddəsini pozmaqda təqsirli bilinib.
Məlumata rayon polisi və məhkəməsindən münasibət almaq mümkün olmayıb.
Nə baş verib: AXCP-dən verilən məlumata görə, təkcə bu ilin əvvəlindən 35-ə yaxın siyasi fəal inzibati hüquq pozmalarında günahlandırılaraq 20-25 sutkalıq həbs cəzası alıblar. Bundan başqa, bu partiyanın 10-a yaxın fəalı son illər müxtəlif ittihamlarla mühakimə olunaraq uzunmüddətli həbs ediliblər. Bəzilərinin də məhkəməsi gedir. Partiya onların siyasi fəaliyyətləri ilə bağlı şərlənərək həbs olunduğunu bəyan edib.
