Beynəlxalq təşkilatların siyasi məhbus kimi tanıdığı Qiyas İbrahimovun anası Şura Əmiraslanova həbsdə oğlunun təxribata çəkilməyə çalışıldığını deyib. Bu barədə Ş.Əmiraslanova Facebook-da məlumat yayıb. Onun sözlərinə görə, bu gün Qiyasla əlaqə saxlayıb və oğlu deyib ki, həbsxanada dustaq yoldaşları ilə onun arasında narazılıq salmağa çalışıblar:
Ümumi yoxlama edilib və Qiyasın çarpayısının səliqəsiz olduğunu bildiriblər. Kamera yoldaşları ilə birlikdə 7 nəfəri 6 saat ərzində ayaq üstündə saxlayıblar və bununla da Qiyasla onlar arasında narazılıq salmağa çalışıblar. Sonra isə Qiyası rəisin otağına aparıblar. Fikrət Qafarov ona deyib ki, professorluq etməsin. Daha sonra ona töhmət verilib.
Bunu da oxu: Qiyas İbrahimovun anası: Qiyasın üstünə atılıb, vurmaq istəyiblər
Ş.Əmiraslanova bildirib ki, Qiyas İbrahim bu gün telefonla danışmaq istəyəndə Həsən adlı nəzarətçi onun ciblərini yoxlayıb:
Qiyasa deyib ki, sən nələrsə yazıb telefonla bayıra çıxarırsan. Oğlum dedi ki, o, həbsxanada bütün qayda-qanunlara əməl edir. Əgər onun cibindən, ya da yatağından hər hansı silah-sursat, narkotik maddə və s. çıxsa, bu, birbaşa rəhbərliyin işidir və cavabdeh də onlardır.
Anası Qiyasın bu məlumatları dediyi səs yazısının olduğunu və iki gün əvvəl Meydan TV-də yazısının dərc olunduğunu da xatırladıb. Ş.Əmiraslanova oğlunun bu yazıdan sonra təzyiqlərlə üzləşdiyini deyir.
