Dövlət Təhlükəsizliyi Xidməti (DTX) Mingəçevir sakini Anar Ələkbərovu dövlətə xəyanət cinayətində şübhəli şəxs qismində saxlayıb.
Rəsmi yayılan məlumata görə 2016-cı ilin mart ayında xarici xüsusi xidmət orqanlarının nümayəndələri Anar Ələkbərovu maddi maraq müqabilində məxfi əməkdaşlığa cəlb edib.
Ona xaricdə ticarət əlaqələri olan bəzi vətəndaşlar, Azərbaycan xüsusi xidmət orqanlarının əməkdaşları, ölkədə fəaliyyət göstərən konkret ölkələrin səfirliklərinin nümayəndələri və Müdafiə Nazirliyinin “N” saylı hərbi hissəsi haqqında məlumat toplamaq tapşırılıb. A.Ələkbərov bu tapşırıqların yerinə yetirilməsi istiqamətində konkret işlər görüb.
Bildirilir ki, iş üzrə çoxsaylı dəlillər toplanılıb. A.Ələkbərov cinayət əməllərini etiraf edərək, təfərrüatları barədə ətraflı məlumatlar verib.
Cinayət Məcəlləsinin 274-cü (dövlətə xəyanət) maddəsi ilə cinayət məsuliyyətinə cəlb olunan A.Ələkbərov barəsində həbs qətimkan tədbiri seçilib. Onu 12-20 il həbs və ya ömürlük azadlıqdan məhrum etmə cəzası gözləyir.
