AXCP sədrinin müşaviri Məmməd İbrahim həbsdən azad olunub.
Vəkili Cavad Cavadov məlumat yayıb ki, bu gün Bakı Apelyasiya Məhkəməsi Məmməd İbrahim barəsində verilən şikayətə baxıb.
Müdafiə tərəfinin şikayəti qismən təmin edilib. Belə ki, M.İbrahimə təyin olunmuş 5 ay 22 gün azadlıqdan məhrum etmə cəzası azaldılaraq, onun faktiki həbsdə yatdığı günlə əvəz olunub.
Nə baş verib: Keçən ilin 29 sentyabrında həbs müddətinin bitməsinə 1 gün qalmış Məmməd İbrahim haqqında Cinayət Məcəlləsinin 317.2.1 (CÇM-də qeyri qanuni əşyaların daşınması) maddəsi ilə yeni cinayət işi açılıb. Suraxanı rayon məhkəməsində Məmməd İbrahimə hökm oxunub. Partiya funksioneri 5 ay 20 gün müddətinə azadlıqdan məhrum edilib. Ona əlavə olaraq 167 manat ekspertiza xərcini ödəmək öhdəliyi də verilib.
İlk həbsi: 2015-ci il sentyabrın 30-da AXCP-nin keçmiş üzvü Mikayıl Quliyevin şikayəti əsasında həbs olunsa da sonradan bu maddə 221.2.2-ci maddəsi ilə (silah tətbiq etməklə xuliqanlıq törətmək) əvəzlənib. Nərimanov rayon məhkəməsinin hökmü ilə 3 il azadlıqdan məhrum edilib.
