Ailə, Qadın və Uşaq Komitəsinin sədri Hicran Hüseynova rəsmi nikah sənədi olmadan kəbin kəsən mollaların cəzalandırılmasını təklif edib.
Modern.az yazır ki, H.Hüseynova Azərbaycanda bütün məscidlərdə dini kəbin kəsdirən şəxslərdən rəsmi nikah sənədi tələb olunduğunu, Qafqaz Müsəlmanları İdarəsinin Qazılar Şurasının fətvası ilə rəsmi nikahsız kəbin kəsilməsinə qadağa qoyulduğunu xatırladıb.
O bildirib ki, bütün bunlara baxmayaraq çoxlu sayda cütlüklərin rəsmi nikahı olmasa da, dini kəbinləri var:
Belə ailələrin hüquqlarını müdafiə etmək bir qədər çətinlik yaradır. Xüsusilə də erkən yaşda nikaha girən qızların hüquqlarının müdafiəsi çətin olur. Buna görə də İnzibati Xətalar Məcəlləsində rəsmi nikah sənədi olmadan kəbin kəsən mollalar üçün məsuliyyətin müəyyən edilməsi zərurəti yaranır. BMT-nin Qadınlara qarşı ayrı-seçkiliyinin bütün formalarının ləğv edilməsi üzrə Komitəsinin ölkəmizlə bağlı tövsiyələrində də bu öz əksini tapıb.
