Tramp fövqəladə vəziyyətin elan edilməsi barədə danışır. Foto: Pablo Martinez Monsivais / AP

ABŞ prezidenti Donald Tramp Meksika ilə sərhəddə divar tikmək ideyasını reallaşdırmaq üçün ölkədə fövqəladə vəziyyət elan etmək istəyir.

Meduza yazır ki, bu barədə prezident Ağ Evdə keçirilən mətbuat konfransında məlumat verib. O, bu üsulla divarın tikintisi üçün lazım olan 3.6 milyard dollar pulu əldə edə biləcəyini düşünür. Fövqəladə vəziyyətin elan edilməsi prezidentə sərhəd divarının tikintisi üçün lazım olan vəsaiti Konqresdən yan keçərək almaq imkanı verəcək.

Fövqəladə vəziyyət nədir: Fövqəladə vəziyyət, ABŞ prezidentinə müvəqqəti olaraq böhranla mübarizə səlahiyyətləri verən xüsusi hüquqi rejimdir. ABŞ qanunvericiliyinə görə, fövqəladə vəziyyət prezidentə geniş səlahiyyət verir. Məsələn, o, istədiyi halda internetin fəaliyyətini dayandıra, yaxud ölkədə hərbçilərdən istifadə edə bilər. Qanunvericiliyə görə, fövqəladə vəziyyət zamanı prezident hansı hüquqlardan istifadə edəcəyi barədə əvvəlcədən Konqresə məlumat verməlidir. New York Times hesab edir ki, sərhəd divarının tikintisinə hərbiçilər cəlb oluna bilər.

Bundan əvvəl fövqəladə vəziyyət elan olunubmu: ABŞ prezidentləri 1976-cı ildə Konqresin qəbul etdiyi “Fövqəladə Hallar haqqında” Qanuna uyğun olaraq fövqəladə vəziyyət elan edə bilər. Misal üçün, 2001-ci ildə 11 sentyabr terror aktından sonra prezident Corc Uoker Buş, 2009-cu ildə isə donuz qripi epidemiyasının yayılmasından sonra prezident Barak Obama ABŞ-da fövqəladə vəziyyət elan ediblər.

Nə baş verib: Tramp administrasiyası düşünür ki, Meksika və Mərkəzi Amerikadan ölkəyə qeyri-qanuni yolla gəlmək istəyən qaçqınlar ABŞ üçün təhlükədir. Prezident sonuncu dəfə Konqresdəki çıxışında da ölkədəki bir çox problemi – narkotik satışı, kriminal hadisələr və s.-i ölkədəki qanunsuz miqrantlarla əlaqələndirib.

Şərhini yaz

Şərhinizi yazın
Adınızı daxil edin