Avropa İnsan Haqları Məhkəməsi hərbi xidmətə yollandıqdan bir həftə sonra evlərinə meyiti göndərilən Urxan Məmmədovun ölümü ilə bağlı qərar çıxarıb.
Azadlıq Radiosu yazır ki, məhkəmə mərhum U.Məmmədovun atası Əli Məmmədovun şikayətini təmin edib.
Bu işdə İnsan Hüquqları və Əsas Azadlıqlara dair Avropa Konvensiyasının 2-ci (yaşamaq hüququ) maddəsinin pozulduğunu təsdiqləyən məhkəmə hesab edib ki, Azərbaycan hökuməti 21 yaşlı gəncin ölümü ilə bağlı effektiv araşdırma aparmayıb.
Bildirilib ki, kommunikasiya vaxtı Azərbaycan hökuməti Strasburqa fotoları ağ-qara formada, şikayətçi Ə.Məmmədov isə onların rəngli versiyalarını göndərib. Rəngli fotolardan görünüb ki, mərhumun boyun nahiyəsində, gözünün altında da göyərtilər var. Ancaq prokurorluğun protokolunda həmin xəsarətlər qeyd olunmayıb.
Avropa Məhkəməsi əsgərin ölümünə görə 15 min avro kompensasiya təyin edib.
Nə baş verib: İyulun 14-də səhər saat 10 radələrində U. Məmmədovun atasına oğlunun ölümü barədə məlumat veriblər. Rəsmi sənədlərdə yazılıb ki, U.Məmmədov səhər saat 5 radələrində xırıldayıb, əsgərlər onu kazarmadan çıxarıb süni nəfəs verməyə çalışıblar. Ardınca da Şəki Mərkəzi Xəstəxanasına aparılsa da, artıq gec olub. Zaqatala Hərbi Prokurorluğunun hadisə yerinə baxış protokolunda yazılıb ki, ölümə aidiyyəti ola biləcək heç bir hal aşkarlanmayıb.
Baxış keçiriləndə artıq onun çarpayısını digər əsgərlər səliqəyə salmış, döşəmə isə araşdırmadan öncə xlor və kerosinlə silinibmiş. Meyitə baxış protokolunda da yazılıb ki, bədəndə müxtəlif xəsarət izləri var: kürəkdə qançır, cızıqlar, dərialtı qansızma, əlində sıyrıqlar. Meyitin fotoları da çəkilərək, sənədlərə əlavə olunub.
Zaqatala Rayon Prokurorluğu üç ay sonra bu ölüm faktı üzrə cinayət işi başlanmasının rədd olunması barədə qərar verib. Ə.Məmmədov oğlunun ölümü ilə əlaqədar prokurorluğun qərarından narazı qalaraq məhkəməyə müraciət edib. Amma yerli məhkəmələrin heç biri onun şikayətini təmin etməyib. Bundan sonra o, Avropa Məhkəməsinə müraciət edib.
