Azərbaycan prezidenti İlham Əliyevin oğlu Heydər Əliyevin Rublyovka-Uspen magistralında öz adına torpaq sahəsi və evi var. Bu barədə “Proyekt” nəşri “Rosreestr”a istinadən məlumat verib. Rusiyanın paytaxtı Moskvanın qərbində yerləşən bu ərazi qeyri-rəsmi olaraq Rublyovka adlanır və prestijli evlərin olduğu ərazidir.
Heydər Əliyevin “Meyendorf Bağları” adlanan qəsəbədə yerləşən sahəsi 7 min kv.m-dən çoxdur. Evin sahəsi isə 1,6 min kv metrdir.
“Proyekt” nəşrinə görə, evin qiyməti 2,3 milliard rubldur (təxminən 35 million dollar). Həmin evin yaxınlığında isə Rusiya prezidenti və Rusiyanın Baş nazirinin iqamətgahları yerləşir.
Prezident oğlu 2007-ci ildə evin sahibi olub, o zaman isə onun 9 yaşı var idi. “Rosreestr”ın məlumatına görə, bu evi ona babası Arif Paşayev alqı-satqı baş tutandan 1 il sonra hədiyyə edib.
“Proyekt” mövzu ilə bağlı Azərbaycan Prezidenti Administrasiyasına sorğu göndərsə də, buna cavab verilməyib.
Mütəşəkkil Cinayətkarlıq və Korrupsiya Hesabatı Layihəsinin (OCCRP) daha əvvəl etdiyi araşdırmaya görə, həmin ərazidə prezidentin qızı Leyla Əliyevanın da evi var.
“Proyekt”in araşdırmasının nəticəsinə görə, prezident və onun həyat yoldaşı Mehriban Əliyeva Böyük Yakimankada yerləşən binada 136 kvadrat metrlik mənzilin sahibidirlər. Sovet dövründə bu rayondan diplomatlar və partiya funksionerləri mənzil alırdılar. İndi burada olan evlər “Meyendorf bağları”na baxanda elə də baha deyil: Əliyevlər ailəsinin mənzili təxminən 100 milyon rubla başa gəlir, bu da demək olar ki, 1,5 milyon dollardır.
Transparency International-ın hesabatında Azərbaycan korrupsiya indeksinə görə 180 ölkə arasında 152-ci yeri tutur.
Əliyevin Bağları
Burada memar Zaha Hadid tərəfindən yaradılan dünyada şəxsi saray var. Sifarişçisi “Capital group”un həmsahibi Vladislav Doronindir.
Zaha Hadidin memarlıq bürosunun saytında yazılıb ki, buradakı şam ağaclarının və tozağaclarının hündürlüyü 20 metrə çatır. Dorninin futuristik evi ağaclar üstündə ucalır, Əliyevlərin sahəsi isə onun arxasında gizlədilib.
Qəsəbənin qurucusu öz saytında zəmanət verir ki, potensial alıcının gizliliyi təmin olunacaq, çünki “yerli auditoriyanın xarakterini başa düşür” və söz verir ki, qəsəbənin ərazisinə “kənar insanlar və mətbuat” daxil olmayacaq.
Leyla Əliyevaya məxsus olan ərazinin sahəsi 7,7 min kv.metrdir, bu ərazi qardaşına məxsus olan evdən bir neçə ev kənardadır. L.Əliyeva da qardaşı kimi bu bahalı daşınmaz əmlaka gənc yaşda, yəni 20 yaşında sahib olub.
İndi həmin qəsəbədə yerləşən ərazini və eyni sahəyə malik olan evləri 2,3 milyard rubl (təxminən 35 milyon dollar) qiymətindədir.
Rublyovkadakı saray – yeganə hal deyil ki, Əliyevlər öz əmlaklarını Heydər Əliyevin adına keçirirlər. 2009-cu ildə, yəni cəmi 11 yaşında, o, Dubayda 9 sarayın sahibi olub. O zaman üçün sarayların qiyməti 44 milyon dollar idi. Dubayda Leyla və Arzu Əliyevalara da məxsus villalar var.
Əliyevlərin binasında yaşayan sakin, “Proyekt”in əməkdaşına bildirib ki, onların nümayəndəsi müntəzəm olaraq evə gəlir, poçt və fakturaları götürür.
“Rosreestr” çıxarışlarında bu mənzilin sahibləri haqqında heç bir məlumat yoxdur. Bu isə o zaman mümkündür ki, mənzilin mülkiyyət hüququ 1998-ci ildən əvvəl alınsın.
