Hər məhkəmədə hakim başqa bir şey deyir. Belə görünür ki, onu işin içindən çıxarıb, Əbülfəzi həbsdə saxlamaq istəyirlər.
Bunu Müsavat Partiyası Gənclər Təşkilatının dələduzluq və sənəd saxtalaşdırmaqda ittiham olunan sədri Əbülfəz Sadıqbəylinin qardaşı Vasif Sadıqbəyli deyib. Onun sözlərinə görə, ötən məhkəmədə hakim mülki iddiadadan əlavə, orada göstərilən qədər məbləğdə dövlətə pul ödənilsə işə xitam verilə bilər. Dünən baş tutan prosesdə isə, deyildi ki, kim ödəsə, ancaq həmin şəxsin işinə xitam veriləcək. V.Sadıqbəyli hesab edir ki, baş verənlərin səbəbkarı bankın əməkdaşı Kamran Abbasov olduğu halda, onu məsuliyyətdən yayındırmaq istəyirlər:
Vaxtilə borcun tam ödənilməsi barədə arayış alınanda banka ödənilməli olan və qardaşımın ona verdiyi 5 min 100 manatı Əbülfəzin həbsindən dərhal sonra gətirib bizə qaytardı. İndi isə daha 11 min ödəyəcək. Əgər adamın özünün iddia etdiyi kimi, günahı yoxdursa, 30 minə yaxın pulu niyə və necə ödəyir? Belə görünür ki, onu işin içindən çıxarıb, Əbülfəzi həbsdə saxlamaq istəyirlər.
Ə.Sadıqbəylinin borcun tam ödənilməsi ilə bağlı arayışı və onun saxta olmadığı ekspertiza zamanı sübut olunub. Amma K.Abbasov arayışı verdiyini təsdiqləsə də pulu aldığını inkar edir, deyir ki, Ə.Sadıqbəylinin əmisi oğlu Asif Sadıqlı ilə dost olduğuna görə pul almadan arayış verib. Asif Sadıqlı isə bunu inkar edir.
Vəkilimiz Osman Kazımov Kamran Abbasova sual verdi ki, əgər pul almayıbsa, onda niyə Əbülfəzin həbsindən dərhal sonra onun ailəsinə 5 min 100 manatı qaytarıb? Əvvəlcə təkzib etsə də, sonradan təsdiqlədi və əlavə etdi ki, guya, yardım kimi verib. Hakim də anladı ki, bank əməkdaşı yalan danışır. Çünki sual yaranır ki, onun bizə bu boyda yardım etməkdə nə marağı ola bilər? – deyə V.Sadıqbəyli əlavə edib.
Nə baş verib: “Nikoil” bank Müsavat Partiyası Gənclər Təşkilatının sədri Əbülfəz Sadıqbəyliyə qarşı mülki iddiasından imtina edib. Bank artıq şikayətçi də deyil. Fevralın 20-də məhkəməyə bu barədə ərizə təqdim olunub. Məhkəmə fevralın 27-də hökm çıxaracaq.
