Oscar gecəsindən qalib ayrılanlar. Foto: oscar.go.com

Amerika Kino Akademiyası 91-ci Oscar mükafatı mərasimində bu il bir çox ilklər yaşandı. Xüsusilə də qaradərililərin ərsəyə gətirdsiyi filmlərin böyük maraqla qarşılanması diqqət çəkdi.

Bəs gecədən qalib ayrılanlar “Oscar” haqqında nə düşünürlər?

Rami Malek. Foto: ABC/Craig Sjodin

“Bohemian Rhapsody” filmində Fredi Merkurini canlandıraraq “Oscar” alan Rami Malek: Bu güclü insanda (Fredi Merkuridə) həm təklik, həm də narahatlıq hissi var idi. Bu iki hissi əlaqələndirə bildim. Mənə etimad göstərən və bu problemin öhdəsindən gələ biləcəyimə inandıran böyük sənətkarlara təşəkkür edirəm.

Piter Farrelli. Foto: Kris Pizzello/ shutterstock

Ən yaxşı film seçilən “Green book”un rejissoru Piter Farrelli: “Mesajımız o idi ki, bir-birimizlə söhbətləşsək, mütləq ortaq nöqtələrimiz olduğunu görəcəyik. Bəzən ümid yoxmuş kimi görünür. Halbuki eləməli olduğumuz tək şey ünsiyyət qurmaq, danışmaqdır. Pollyana kimi səslənə bilərəm, ancaq dediklərim həqiqətdir.

Maherşala Əli. Foto: Vanity Fair

“Green Book” filmindəki roluna görə mükafatlandırılan Maherşala Əli: Çox şadam. Buradakı cənabların hamısı buna layiq idi və mənim yerimdə ola bilərdi. Həyatımda rolu olan hamıya təşəkkür edirəm.

Rut Karter. Foto: Elle.com

“Black Panther” filmi ilə ən yaxşı kostyum dizaynı nominasiyasında qalib gələn dizayner, bu nominasiya üzrə “Oscar” alan ilk qaradərili qadın Rut Karter: Qaradərili, yaradıcı insanlar üçün qapı açdıq. Bu başqa qaradərililərin də mənim kimi “Oscar” sahibi ola biləcəyini göstərir. Bu gecə üçün çox xəyal qurdum, çox dua etdim. Çünki bu sahədəki gənclər üçün nə məna kəsb etdiyini bilirəm.

Oliviya Kolman. Foto: Hellomagazine

“The Favourite” filmində canlandırdığı kraliça obrazına görə mükafat alan Oliviya Kolman: Sizinlə hisslərimi bölüşə bilmədim. Gələn il hisslərimi düzgün şəkildə ifadə edəcəyəm. Amma indi özümlə nə edəcəyimi bilmirəm. Belə vəziyyətdə kraliça Enn deyərdi ki, keks bişir, çoxlu ye və xəstələn.

Rayka Zehtabçi. Foto: Getty images

Ən yaxşı qısa sənədli film nominasiyasının qalibi “Period. End of Sentence”in rejissoru, “Oscar” qazanan ilk iran əsilli amerikalı qadın Rayka Zehtabçi: Filmi ilk izləyənlər arasında kənddəki qadınlar da var idi. Özləri ilə fəxr etdilər. Bu onların həyatında bir çox şeyi dəyişib. Həqiqətən xoşbəxtik.

Bekki Neyman Kobb və Domi Şi. Foto: Jordan Strauss/AP

Ən yaxşı qısa animasiya nominasiyasında qalib gələn “Bao”nun ssenaristi və rejissoru Domi Şi: Biz çox xoşbəxtik. “Bao” Akademiya və dünya tərəfindən qəbul olundu. Bu yaxınlarda “Pixar” qadın rejissorların ərsəyə gətirdiyi daha 2 film istehsal edib. “Bao” cığır açdı. Bir çox sahədə ilklərə addım atmağın xoşbəxtliyini yaşayırıq”.

“Bao” filminin prodüsseri Bekki Neyman Kob: “Oscar” mükafatları mərasimlərini izləyərək böyümüşəm. Bizim evdə həmin gecə bayram kimi qeyd edilirdi. Axşam yeməyini yeyərkən izləyə biləcəyimiz şou idi. İndi burada olduğum reallığını ağlım dərk edə bilmir.

Şərhini yaz

Şərhinizi yazın
Adınızı daxil edin